OEKUSI, 17 Dezembru 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), tersa ne’e, orienta ona Intitutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI,I.P) hamutuk ho kompañia PAX sobu ona kafetária “O Manhoso” iha jardín monumentu Koreanu Oébau, Rejiaun Administrativa Espesiál Oekusi Ambeno (RAEOA).
Prezidente Autoridade RAEOA, Régio da Cruz Salu, informa planu ba implementasaun dezpezu administrativu ne’e ne’e planeiadu ona husi Autoridade Sesante sira, atu hamamuk, tanba Jardín Koreanu nu’udar fatin púbiku no fatin istória ba forsa Koreanu na’in-lima ne’ebé mate iha Oekusi iha tinan-2003.
“La’ós ha’u mak inísia eviksaun ba fatin ne’e, maibé planu ne’e uluk kedas husi autoridade sesante sira. Tuir loloos foin daudaun ho prezensa SEATOU ita realiza ona, maibé tanba iha mis-komunikasaun uitoan, ne’e mak adi’a uitoan, nune’e labele hanaruk polemika, tanba ita hotu hamutuk serbisu ho objetivu ida de’it, nune’e ita realiza saida mak ita tenke halo,” Prezidente Autoridade RAEOA iha Oekusi dehan, ohin.
Notísia relevante:Ohin, SEATOU la konsege halo despezu administrativu ba kafetária “Manhoso” iha Jardín Oébau
Autoridade RAEOA ne’e, konfirma hafoin halo despezu administrativu, planu ba futuru, Autoridade RAEOA sei re-dezeña no remodela fila-fali, atu hadi’a di’akliu tan nu’udar fatin omenajén ba monumentu forsa Koreanu na’in-lima.
“Iha semana ne’e nia laran, ha’u hetan informasaun, mai haree rasik, sira hahú halo desligasaun ba liña elétrisidade, horseik orden públika ho kompaña PAX mai hamoos no hasai sasán no ohin ekipa IGEADI komesa halo eviksaun, no tuirmai ita entrega ba parte ne’ebé responsavel atu remodela fatin espasu públiku ne’e, tanba iha fatin ne’e, monumentu Koreanu nian, ita hakarak haree furak no fó omenajén ba prezensa ba fatin ne’e, tanba fatin ne’e espasu públiku, sentru ba ema hotu liu-liu ba labarik sira-nia halimar, ha’u hanoin ita sei re-dezeña no remodela fila-fali nafatin ba espasu públiku,” nia hateten.
Notísia relevante:SEATOU fó prazu ba kafetária iha Jardin Koreanu Oébau hamamuk fatin
Hafoin ekipa IGEADI,I.P halo eviksaun, journalist Ajénsia Tatoli,I.P. tenta konfirma kafetária na’in, maibé laiha fatin.
Entretantu monumentu Jardin Koreanu ne’e, nu’udar omenajen ida ba Militar Koreanu naʼin-lima neʼebé mate iha Oekusi hanesan bainhira hala’o misaun pás liuhusi ONU nian. Koreanu sira ne’e husi “Evergreen”. Trajedia ne’e akontese iha loron 06 Marsu 2003 tanba dezastre naturál-udan iha mota Noel-Ekat, suku Bobometo, sub-rejiaun Oésilo.
Jornalista: Abílio Elo Nini
Editór: Rafael Ximenes de A. Belo
