DILI, 01 Janeiru 2026 (TATOLI)-Arsebispu Arkidioseze Metropolitana Dili, Don Virgílio Kardeál do Carmo da Silva, SDB, haktuir mensajen Papa Leão XIV hodi husu ema hotu halo pás hahú husi an rasik no sai uma ba pás nian, tanba 01 Janeiru selebra Loron Mundiál ba Pás ba da-68 no solenidade Santa Maria, Jezús nia Inan, ne’ebé sai sinál esperansa ba sarani katólika iha mundu.
Iha omília iha Igreja Katedrál Dili, Don Virgílio hateten katak kada tinan Amu Papa hato’o mensajen ba mundu kona-ba ba pás no iha tinan ida-ne’e konvida ema hotu atu hamriik metin iha pás, halakan iha moris, molok fahe ema seluk.
“Nia [Papa] hahú hodi dehan ‘a paz esteja com todos vos’, husi liafuan barak ne’ebé nia hakerek, ha’u hakarak sita de’it liafuan balun ne’ebé ita bele lori iha ita-nia fuan mak nia dehan sé o hakarak atrai ema seluk ba pás, ó mak tenke hahú uluk, hamriik metin iha pás, halakan iha imi-nia moris, molok fahe ba ema seluk”, Don Virgílio esplika,” ohin.
Nia subliña katak iha Loron Mundiál ba Pás, Amu Papa husu atu komunidade idaidak bele sai uma pás nian no promove diálogu ba dame.
“Tinan foun ida-ne’e, Amu Papa konvida ita atu harii uma pás nian iha idaidak nia fatin, tanba pás mak sentru ba moris ema nian”, dehan.
Arsebispu lembra katak 01 Janeiru selebra loron solenidade Santa Maria, inan ida ne’ebé hatudu nia oan bá mundu atu sai salvasaun. Tuir nia, Santa Maria nu’udar inan dame nian no sai ezemplu ba ema tomak.
“Oan sira aprende lisaun sira ne’ebé importante husi inan sira. Iha tempu ida, inan nu’udar inspirasaun ba ita, nune’e presiza apreende husi Na’i-Feto sai sarani ida ne’ebé di’ak. Husu ita hotu agradese ba Maromak, husu Maromak nia tulun liuhusi Na’i-Feto atu hafoun ita-nia esperansa ba iha Maromak”, dehan.
Nia husu sarani sira atu halo orasaun ba pás nian iha mundu, liuliu iha iha Timor-Leste, no tau konfiansa ba Maromak no husu Jezús atu liberta nia povu.
“La’ós ho forsa, podér, maibé ho ninia domin ne’ebé liberta ita. Ita ne’ebé lakon tiha ona istima ba ita-nia an, keta halo ita sai prezu ba ita-nia hahalok aat sira. Ohin, Jezús hakarak atu dehan ba ita Maromak hadomi ita, nunka husik ó, nia hein ho pasiénsia atu ó filafali ba nia”, realsa.
Kardeál akrexenta katak Jezús loke filafali odamatan fraternidade nian atu hetan fali ema ne’ebé iha fuan sente no ema ne’ebé iha matan bele haree no ema ne’ebé iha tilun bele rona ema seluk nia susar.
Iha fatin hanesan, Amu Pároko Katedrál Dili, Pe. Paulus Maya, hateten kona-ba pás husu kada ema sai autór prinsipál ba pás nian.
Tuir saserdote, durante selebrasaun Natál no tinan foun, komunidade iha Parókia Katedrál preokupa sobre situasaun seguransa iha bairru balun, tanba konflitu, tuda malu no problema.
“Maibé ami nafatin halo esforsu hodi kombate, no loron dame ida-ne’e ita hamutuk lori dame hahú husi uma-laran to’o sosiedade, tanba dame mak sai sentru ba moris nian”, konklui.
Notísia relevante: Loron Eroi Nasionál: Don Virgílio husu timoroan banati tuir prinsípiu lutadór sira
Jornalista: Arminda Fonseca
Editora: Maria Auxiliadora
