DILI, 02 Jullu 2026 (TATOLI)—Diretór Kompras iha Institutu Nasional Farmasia Produtu Medikamentu (INFPM), Sergio Belo, informa estoke ba vasina antí raiva daudaun ne’e iha vial 20 mak asegura iha armajen sentrál.
“Estoke vasina antí raiva kuaze ita distribui hotu ba iha Sentru Saude no Hosital Nasional Guido Valadares hodi atende ba kazu sira-ne’e,” Sergio Belo dehan ba jornalista sira iha INFPM Kampung Alor, ohin.
Nia relata, estoke vasina antí raiva ne’e INFPM sosa liu husi UNICEF nune’e tempu badak sei hatama fila-fali vasina ne’e mai iha Timor-Leste.
“Iha vial 20 ne’e espera kazu labele mosu tan tanba prosesu aporvizionamentu ne’e husi UNICEF nia liman, sira mak sosa no momentu ne’e ita hein,” nia dehan.
Antes ne’e, Institutu Nasionál Farmásia Produtu no Médikamentu simu pedidu kona ba ai-moruk raiva husi Munisípiu Bobonaru, Kovalima, Ermera no Rejiaun Administrativu Espesiál Oé-Cusse Ambeno tanba kazu iha área refere barak.
Diretór Internu INFPM, Miguel Soares, hateten kona ba ai-moruk raiva Munisípiu sira-ne’ebé mak hatama pedidu barak-liu mak munisípiu haat ne’ebé mak identifika katak risku ba virus Raiva.
“Iha ne’e, munisípiu ka área ne’ebé ke ninia pedidu tama barak liu mak Maliana, Suai, RAEOA inklui Ermera ne’e rasik. Área haat ne’e mak sira-nia pedidu tama maka’as,” nia dehan.
Nia esplika, daudaun ne’e eatoke raiva desponivel hela tanba foin iha semana kotuk mak simu tan husi Organizasaun Saúde Mudiál hamutuk vial rihun 10.
“Vasina Raiva agora daudaun ita-nia sctok seguru loos no desponivel ita hein de’it. Tanba, iha semana kotuk ita hetan distribui husi OMS kuaze vial rihun 10, ne’ebé ita-nia estoke seguru hela. Ne’ebé, perdidu sira mai, hakarak ka lakohi, ami tenke hatn kedas tuir kuantidade ne’ebé mak mensiona iha pedidu husi fasilidade saúde ida-idak,” nia dehan
Nia informa, kona-ba distribuisaun ba fasilidade saúde to’o nia parte seidauk simu infomasaun ba ida.
“Kona ba distribuisaun ho kuantidade hirak to’o agora ha’u seidauk simu infomasaun ba ida-ne’e, maibé prosesu distribuisaun diáriamente la’o,” nia dehan.
Jornalista : Felicidade Ximenes
Editór : Cancio Ximenes
