Top

Aplikante 2.071 ba vaga Karreira Espesializada iha HNGV sei tuir teste faze entrevista

Diretór Servisu Apoiu Diagnóstiku no Terapéutiku HNGV, Vidal de Jesus Lopes. Imajen TATOLI/António Daciparu

DILI, 17 Novembru 2026 (TATOLI)—Prezidente Juri ba Komisaun Rekrutamentu Vaga Karreira Espesializada iha Hospitál Nasionál Guido Valadares (HNGV), Vidal de Jesus Lopes, aplikante 2.071 ne’ebé konkorre no liu iha teste eskrita ba vaga HNGV ne’e, sei tuir teste faze entrevista iha semana ida-ne’e ho durasaun to’o semana tolu.

Ekipa júri husi Komisaun Funsaun Públika (KFP) agora daudaun prepara hela lista no oráriu ba kandidatu sira-ne’ebé pasa ba faze entrevista, atu bele hala’o teste tuir kalendáriu ne’ebé sei publika.

“Kandidatu sira-ne’ebé pasa ba faze entrevista hamutuk 2.072, maibé HNGV sei hili de’it kandidatu na’in-478 atu prienxe vaga karreira espesializada ne’ebé disponivel,” Vidal de Jesus Lopes informa ba Jornalista sira iha nia kna’ar fatin HNGV, Bidau, ohin.

Nia dehan, prosesu rekrutamentu ba faze datoluk agora daudaun prepara hela, hein katak ekipa juri husi Komisaun Funsaun Públika (KFP) atu fó sai lista no oráriu, atu teste entrevista bele hahú iha semana ida-ne’e ho durasaun semana tolu ho loron efetivu servisu nian.

Nia mós informa, durante prosesu teste sira to’o iha prosesu teste entrevista ne’e, komisaun simu reklamasaun hamutuk 24 husi kandidatu sira.

“Reklamasaun hirak-ne’e mai husi kandidatu ne’ebé la konkorda ho rezultadu, inklui balun ne’ebé konsidera katak sira-nia valór kiik no husu oportunidade atu halo teste fali,” nia dehan.

Nia hatutan, HNGV sei analiza no verifika didi’ak reklamasaun hotu-hotu antes fó resposta ba kandidatu sira. Rezultadu husi reklamasaun ne’e sei públika hamutuk ho oráriu teste entrevista iha publikasaun ida.

“Prosesu rekrutamentu tenke kontinua tuir etapa no prosedimentu ne’ebé lei determina, tanba ne’e, kandidatu sira tenke respeita prosesu ne’ebé lao hela no la bele fila-fali ba etapa sira ne’ebé remata ona,” nia dehan.

Jornalista : Felicidade Ximenes

Editór        : Cancio Ximenes

Publisidade

Leave a Reply

Latest Post

error: Content is protected !!