Top

Trimestre datoluk, Banco de Sangue rekolla estoke raan hamutuk 2.070

Pesoál Banku Sangue Hospitál Nasionál Guido Valadares (HNGV), hasai raan ba kontributór raan sira iha ámbitu komemorasaun loron traballu nian, iha salaun SEFOPE Caicoli Díli, segunda (29/04). Imajen Tatoli/Francisco Sony

DILI, 18 Novembru 2026 (TATOLI)—Xefe Departamentu Banco de Sangue iha HNGV, Alexandrino Mendonça, informa iha trimestre datoluk husi Jullu to’o Setembru ne’e, Banco de Sangue rekolla raan hamutuk rihun 2.070 hodi apoiu ba pasiente sira-ne’ebé mak presiza raan iha ospitál sira.

“Husi raan ne’ebé mak ita kolleta, ita halo maibé raan sira-ne’ebe mak ita halo transfusaun ne’e mak rihun 2.188. Raan rua ne’e diferensa uitoan raan sira-ne’e mai fahe ba komponente Planet donor ne’e diferensa ho transfusaun nian,” Xefe Departamentu Banco de Sangue, Alexandrino Mendonça, hateten ba Jornalista sira iha nia kna’ar fatin HNGV, Bidau, ohin.

Nia relata, raan ne’ebé Banku de Sangue koileta hahú husi fulan Jullu 836, Agostu 579 no Setembru 655.

“Stock raan ne’ebé mak ita susar hetan mak tipu raan ho AB ne’e, tanba husi dadus ne’ebé mak iha no pasiente ne’ebé mak baixa tipu raan AB ne’e menus loos iha ita-nia rain, tanba ne’e mak raan ne’e ladún barak ida-ne’e mak ita susar atu hetan tipu raan ne’e,” nia dehan.

Nia esplika, estoke raan ne’ebé mak daudaun ne’e disponivél iha 53 ne’e kompostu husi tipu raan sira-ne’ebé mak iha.

“Tipu raan A hamutuk haat, tipu B hamutuk 13, tipu O hamutuk 27 no raan tipu AB sia (9). Maibé ida-ne’e temporária de’it tanba raan tipu A no B mak menus liu kompara ho tipu raan seluk, tanba pasiente ne’ebé presiza raan tipu A no B iha númeru menus. Nune’e mós doadór ho tipu raan hirak-ne’e limitadu. Raan tipu O mak barak liu, enkuantu tipu raan A no B mak susar liu atu hetan, tanba númeru doadór ho tipu raan hirak-ne’e mós menus,” nia informa.

Nia haktuir, atividade doasaun raan la’o kontínua durante loron tomak. Kuantidade estoke bele aumenta ka tun, depende ba númeru doadór ne’ebé mai no nesesidade pasiente sira iha ospitál.

“Maibé ita mós rekoñese katak Banco de Sangue enfrenta ona difikuldade menus plástiku ba rai raan iha  fulan ne’e, tanba plástiu raan sira-ne’e tenke sosa liuhusi Institutu Nasionál Farmásia no Produtu Médiku (INFPM), ne’ebé halo prosesu kompra iha rai-li’ur, nune’e presiza tempu atu to’o iha Timor-Leste,” nia dehan.

Nia afirma, problema ne’e konsege rezolve ona iha loron Domingu, bainhira ekipa Banco de Sangue ba foti plástiku raan hodi lori mai HNGV, atu kontínua asegura servisu atendimentu ba pasiente sira.

“Ha’u garante katak agora doasaun raan no atendimentu la’o fali hanesan baibain. Kona-ba distribuisaun raan, Banco de Sangue fó prioridade ba pasiente sira-ne’ebé interna iha HNGV, depois mak atende ospitál referál sira hanesan Ospitál Maubisse no Ospitál Baukau inklui mós klinika sira-ne’ebé asina akordu ho Ministériu Saúde,” nia dehan.

Tanba Banku de Sangue mós oferese ba Klínika Maternidade Fatumeta, Banku de Sangue mós fornese raan tuir nesesidade pasiente sira liuliu bainhira iha aumentu kazu moras dengue, ne’ebé durante períodu balun aumenta nesesidade ba transfusaun raan.

“Ba iha klinika sira-ne’ebé presiza Banco de Sangue, sira tenke haruka uluk amostra raan mai Banco de Sangue atu halo teste no verifikasaun, depois mak klínika hirak-ne’e bele mai foti raan tuir nesesidade. Atu asegura disponibilidade raan, Banco de Sangue mós iha akordu servisu hamutuk ho Cruz Vermelha Timor-Leste liuliu iha área sensibilizasaun, aproximasaun no mobilizasaun doadór voluntáriu iha komunidade no instituisaun sira,” nia dehan.

Entrentau, doadór sira-ne’e mai husi voluntáriu husi instituisaun sira kompostu mane na’in-188 no feto na’in-64.

Nune’e mós, doadór individuál ne’ebé mai diretamente iha Banco de Sangue ne’e kompostu husi mane hamutuk na’in-58 no feto na’in-11.

Jornalista : Felicidade Ximenes

Editór        : Cancio Ximenes

Publisidade

Leave a Reply

Latest Post

error: Content is protected !!