MS nafatin halo fumigasaun no fahe abate ba área risku sira
DILI, 13 Novembru 2026 (TATOL)—Prezidente Institutu Nasionál Saúde (INSPTL), Nevio Sarmento, hateten Ministériu Saúde nafatin halo sensibilizasaun halo fumigasaun no fahe abate ba área risku sira no prepara an ba udan monu-rai.
“Ami halo kolaborasaun liuhusi diresaun nasionál, kontrolu moras no promosaun edukasaun saúde, ita prontu nafatin halo fumigasaun no abate no ita fahe nafatin informasaun katak udan besik monu-rai ona, ita tenke hamoos ita-nia fatin sira liuliu hamoos bee nalihun sira hodi prevene moras dengue,” Nevio Sarmento hateten ba jornalista sira iha Timor Plaza, ohin.
Nia hateten, husi parte ospitál sira liuliu laboratóriu tenke prepara reajente sira, nune’e kazu ruma akontese prontu atu uza halo tratamentu.
Antes ne’e, Diretór Edukasaun Promosaun Saúde iha Ministériu Saúde, Jaime Belo, hateten husi Janeiru to’o 13 Outubru ne’e, Ministériu Saúde halo ona fumigasaun no abatisazaun ba uma kain hamutuk 238.398 iha territoriu Timor-Leste.
Nia dehan, husi Munisípiu Aileu ne’ebé ekipa halo ona abatizasaun hamutuk 2.651 no fumigasaun ba uma kain hamutuk 3.473, Ainaru uma kain ne’ebé hetan abatizasaun hamutuk 3.787 no fumigasaun hamutuk 2306, Ataúru uma kain ne’ebé tau abatizasaun hamutuk 5.790 no fumigasaun hamutuk 1.762.
Munisípiu Baukau iha uma kain ne’ebé tau abatizasaun hamutuk 10.055 no fumigasaun hamutuk 7.086, Bobonaru uma kain ne’ebé tau ona abatizasaun hamutuk 8.678 no fumigasaun hamutuk 5.577, Kovalima uma kain ne’ebé tau ona abatizasaun hamutuk 3.879 no fumigasaun hamutuk 5.227.
Munisípiu Dili uma kain ne’ebé mak tau ona abatizasaun hamutuk 70.350 no fumigasaun hamutuk 50.442, Ermera uma kain ne’ebé mak tau ona abatizasaun hamutuk 7.261 no fumigasaun hamutuk 3.010, Lautein uma kain ne’ebé mak tau ona abatizasaun hamutuk 2.860 no fumigasaun hamutuk 8.549.
Iha Likisá uma kain ne’ebé mak tau ona abatizasaun hamutuk 3.547 no fumigasaun hamutuk 941, Manatutu uma kain ne’ebé tau ona abatizasaun hamutuk 2.495 no fumigasaun 842, Manufahi uma kain ne’ebé tau ona abatizasaun hamutuk 5.437 no fumigasaun hamutuk 1.939, RAEOA uma kain ne’ebé mak tau ona abatizasaun hamutuk 5.283 no fumigasaun 5.037, Vikeke uma kain ne’ebé mak tau ona abatizasaun hamutuk 4.265 no fumigasaun hamutuk 5.869.
Nia relata, daudaun ne’e Ministra Saúde orienta ona katak atu halo preparasaun ba kimiku sira tanba haree katak udan atu monu rai ona, oinsá halo preparasaun nune’e halo prevensaun ba moras dengue ida ne’e.
“Ita-nia estoke fumigasaun no abatizasaun sufisiente hela, tanba foin lalais ita-nia parseiru sira kontinua apoiu hela. Nune’e husu Munisípiu sira karik kimiku la iha bele halo pedidu mai, nune’e bele distribui ba ita-boot sira. Agora daudaun ami halo hela intervensaun ba Munisípiu Bobonaru, Kovalima, Ataúru no Dili, ida-ne’e mak ami halo hela fumigasaun nomós fahe abate ba munisipiu sira-ne’ebé mak Ministra Saúde orienta ba,” nia informa.
Ba munisípiu sira seluk situasaun normal hela, entaun ida-ne’e mak MS seidauk halo intervensaun, maibé ekipa mós aviza hela ba Diretór Munisípiu sira katak se fatin risku hahú fahe ona abate no fumigasaun, tanba udan mós hahú monu rai nune’e halo prevensaun sedu,” nia dehan.
Jornalista : Felicidade Ximenes
Editór : Cancio Ximenes
