DILI, 08 Jullu 2026 (TATOLI)—Jogadór atakante Zenivio Mota susesu lori ekipa Karketu Dili FC ho naran istimadu Matak Malirin rekolla pontu tolu husi Aitana FC hafoin marka golu ikus iha minutu 86 iha Liga Futeból Timor-Leste.
Jogu ne’ebé hala’o iha Estádiu Munisipál Dili, kuarta kalan, tuku 17h30 to’o ramata ne’e, fó vitoria ba Karketu hodi okupa tabela klasifikasaun provizoriu daruak ho pontu 13, no pozisaun dahuluk lidera husi SLB Laulara ho pontu 13 maibé ho golu ne’ebé barak liu.
Bainhira árbitru huu árbitu dahuluk, jogadór sira fó kedan presaun ba malu. Karketu halo jogu la ansi, Aitana halo kontra-atake ne’ebé másimu oinsa bele prodús lalais golu.
Robinho da Silva hetan oportunidade no halo jogu iha liña klaran, dudu bola aas ba kaixa penalidade Karketu nian, simu kedan husi Richard Nanai simu ho nia peitu kontrola no marka golu ba rede Karketu halo guarda-rede Egidio de Oliveira salva la hetan iha minutu lima (5), hodi muda rezulatdu 1-0 ba Aitana.
Maske lakon ona golu ida, Karketu la lakon esperansa, Zenivio mota ho nia kolega sira kontinua organiza malu hatudu jogu ne’ebé brillante.
Iha minutu 35, avansadu Karketu Angenuku Viegas hetan bola pasa ida husi Nelson Viegas, nia brani lori bola tama ba kaixa penaliade Aitana nian, maibé defeza Aitana Mario Neves konsege hapara.
Aitana konsentra hikas jogu hodi lansa kontra-atake, maibé Karketu halo blokia metin to’o minutu primeira parte termina laiha tan golu ida mak akontese, entaun rezulatdu provizóriu 1-0 ba Aitana.
Iha inisiu segunda parte, treinadór Karketu Bernard halo mudansa ba jogu hodi orienta jogadór sira konsentra hotu ba liña oin Aitana nian. Jogu sai manas liutan, defeza parte karuk Yohanes Gusmão lansa atake ida hodi manda bola ba avansadu Mumin Mohammed, maibé sutu Mumin nian la kona iha alvu.
Karketu tenke joga ho pasiénsia hodi hein sira-nia vantajen, maibé Aitana halo presaun ne’ebé maka’as, defeza Karketu Nelson Viegas no Orcelio da Silva la fó fatin. Aitana falla atu aumenta golu no Karketu iha oportuniade atu prodús golu.
Jogu la’o to’o minutu 66, Daniel Asino hetan oportunidade bainhira bola barullu iha kaixa penaliade Aitana nian, nia lansa sutu ida ho kalma no bola tama liu ba rede laran halo guarda rede Samuel Noli labele salva mak rezultadu nakfilak ba 1-1.
Jogu sai manas liutan bainhira Karketu halo empata ona jogu ne’e. Aitana hahú muda estratejia jogu, sira hahú joga nakloke, maibé Karketu la fó fatin.
Iha tempu restu segunda parte nian, iha minutu 86, Karketu realiza mehi ne’ebé sira hein kle’ur ne’e mosu, jogadór Zenivio Mota marka golu ikus hodi muda rezultadu ba 2-1. Husi jogu ne’e Zenivio hanesan eroi basá salva Karketu husi empata ba vitória hodi lori pontu tolu kompletu ba Karketu.
To’o árbitu finál termina vitória monu ba Karketu no Aitana hela ho derrota hodi hein fali jogu seluk iha tempu tuir mai.
Jornalista : Hortêncio Sanchez
Editór : Cancio Ximenes
