KOVALIMA, 07 Janeiru 2026 (TATOLI)- Servisu Munisipál Edukasaun Kovalima, nota katak eskola balun kontinua hasoru problema menus profesór atu hala’o prosesu aprendijazen ba alunu sira iha eskola sira.
“Foin lalais ita lakon rekursu di’ak tanba Adjuntu Diretór EBC Beco hakotu ona nia pregrinasaun moris ne’ebé maka ita sei menus professór, maske halo ona rekrutamentu, maibé nafatin la to’o”, Diretora Servisu Munisípiu Edukasaun Kovalima, Elda de Fátima, hato’o iha AMC.
Dirijente ne’e dehan, Ministériu Edukasaun hala’o rekrutamentu, maibé Kovalima-oan la prenxe, nune’e kolokasaun profesór sira mai husi munisípiu seluk tanba tuir prosesu teste Kovalima-oan barak maka laliu.
“Profesór importante tanba profesór laiha sei la mosu kualidade no husu ba dirijente Eskola sira esforsu nafatin”,
Bazeia ba dadus eskola sira iha munisípiu Kovalima hamutuk 106, kompostu Eskola Bázika Centrál (EBC) 24, Filiál 73, Eskola Ensinu Sekundáriu neen, eskola ensinu tékniku vokasionál tolu ne’ebé maka eziste iha Kovalima.
Totál Profesór hahú pré-eskolár, Ensinu Báziku Centrál (EBC), Ensinu Sekundáriu (ES) no Ensinu Tékniku Volasionál (TEKVOK) ne’ebé maka hanorin iha munisípiu Kovalima hamutuk 982 husi númeru ne’e mane-589 no feto-393 no profesór na’in-166 tama iha lista reforma obrigatóriu.
Jornalista:Celestina Teles
Editór : Florencio Miranda Ximenes
