KOVALIMA, 3 Janeiru 2026 (TATOLI)- Progresu Implementasaun projetu Dezenvolvimentu Integradu Munisipál (PDIM) 2025, iha munisípiu Kovalima, daudaun ne’e atinje ona 85%.
Diretór Servisu Munisipál ba asuntu Planeamentu Integradu no Dezenvolvimentu, Carlito Barros Reis, relata Projetu PDIM 2025 fó priiridade ba setór saúde ne’ebé foku halo konstrusaun Sentru Saúde Komunitária iha Fatumea no konstrusaun rezidénsia ba médiku sira iha Fohorem no mós konstrusaun ba irrigasaun iha Zumalai.
“Iha 2025, ita iha projetu tolu de’it ne’ebé foku ba setór saúde no agrikultura inklui ho projetu poupansa hamutuk projetu PDIM haat ne’ebé nia progresu projetu ida finaliza ona sira seluk mós besik atu finaliza ona” Dirijente SMPID, Carlito Barros Reis, relata ba TATOLI, iha resintu AMC, ohin.
Iha 2025 Kovalima hetan projetu PDIM tolu ne’ebé foku ba setór saúde no setór agrikultura, maibé husi projetu tolu ne’e autoridade Kovalima iha orsamentu poupansa husi projetu tolu hamutuk $85 170.82 ne’ebé autoridade uza hodi halo konstrusaun Jardí Sekretáriu Sub Rejiaun 12 Outobru “Sesurai” nia progresu konstruisaun finaliza ona .
“ Konstrusaun jardín Sekretáriu Sub Rejiaun 12 Outobru “Sesurai” ffinaliza ona no maka hein atu inaugura tanba dadaun ne’e empreza sei halo limpeza hodi kompleta kuda ai-funan no seluk”, nia informa.
Orsamentu Jerál Estadu (OJE) 2025 ba implementasaun projetu Planeamentu Dezenvolvimentu Integradu Munisipál (PDIM) ba setór Saúde no agrikultura ne’e hamutuk rihun $711-resin.
Jornalista:Celestina Teles
Editór:Florencio Miranda Ximenes
