DILI, 12 Janeiru 2026 (TATOLI)—Ministériu Asuntu Kombatente Libertasaun Nasionál (MAKLN) liuhosi Diresaun Nasionál Pensaun no Subvensaun (DNPS), kontinua halo atendimentu kombatente no família mártir hosi Munisípiu Lautein hamutuk 2.940.
Tuir nota komunikadu ne’ebé TATOLI asesu, iha Segunda ne’e katak benefisiáriu sira-ne’e sei mai atualiza uluk sira-nian dadus pesoál iha Sistema-Baze-de-Dadus, hafoin tékniku sira imprime fixa pagamentu entrega ba sira no lori bá halo levantamentu osan iha banku sira-ne’ebé sira loke ona konta-bankária ba.
Dokumentu ne’ebé tenke lori no aprezenta ba tékniku sira maka hanesan Kartaun Eleitóral ho Billete Identidade ba benefisiáriu ne’ebé atu foti rasik ninia pensaun, maibé ba sertidaun kazamentu nian ba hirak ne’ebé atu foti sira-nia la’en ninian pensaun no sertidaun baptizmu ba oan sira-ne’ebé atu foti sira-nia inan-aman nia pensaun.
“Tanba, dokumentu sira-ne’e nu’udár evidénsia ida atu tékniku sira bele identifika, komprova no legaliza, hafoin lori bá aprezenta iha banku hodi halo levantamentu bá sira-nian pensaun,” komunikadu dehan.
Bazeia ba oráriu ne’ebé estabelesidu, atendimentu ba benefisiáriu hosi Lautein, hala’o durante loron-lima, hahú hosi Segunda ne’e, loron 12 to’o 16 Janeiru 2026.
Tuir dadus ne’ebé mak iha, loron-15 Dezembru 2025 to’o 09 Janeiru 2026, MAKLN distribui ona fixa pagamentu besik rihun-ualu.
Jornalista: Osória Marques
Editór: Xisto Freitas da Piedade
