DILI, 12 Janeiru 2026 (TATOLI)–Ministru Ensinu Superiór, Siénsia no Kultura, José Honório da Costa Pereira Jerónimo hateten Ministériu Ensinu Superiór, Siénsia no Kultura (MESSK) iha planu tinan-ne’e halo reabilitasaun ba saladeaula hitu (7) iha eskola Nino Konis Santa, nune’e tinan 2027 hahú simu estudante foun ba Eskola Superiór Otelária no Turizmu Lospalos.
“Tanba tau ona orsamentu kuaze rihun $63, atu halo reabilitasaun ba saladeaula hitu, iha eskola Nino Konis Santa iha tinan ne’e. Osan ne’e iha fundu infraestrutura. Preparasaun ba buat hotu la’o hela. Ita hein nia rezultadu,” José Honório dehan ba jornalista sira iha nia kna’ar fatin, Kolmera, Tersa ne’e.
Tuir Ministru José Honório katak estabelesimentu Eskola Superiór Otelária no Turizmu iha Lospalos hodi mobiliza joven sira mai Dili sei menus, tanba joven sira sei bá fali munisípiu.
“Ha’u hanoin karik loke tan eskola superiór otelária no turizmu iha Lospalos,” nia katak.
Governante subliña ministériu halo ona koordenasaun ho Institutu Politékniku Turizmu Bali, atu fasilita treinamentu ba profesór timoroan sira, nune’e sira fila atu haruka profesór timoroan sira bá tuir treinamentu.
“Ami koordena ona ho Politékniku Turizmu Bali, atubele haruka ita-nia profesór timoroan sira bá foti esperiénsia iha-ne’ebá, depoiz sira fila mai iha 2027, ita bele hahú simu ona estudante foun iha Eskola Otelária no Turizmu Lospalos,” José Honorio dehan.
Aleinde ne’e, nia tenik, ministériu mós haruka ona profesor na’in-sanulu (10) ba hala’o estudu iha Tailándia, nune’e bainhira eskola ne’e simu estudante foun, ministériu iha ona rekursu ne’ebe sufisiente atubele hanorin.
“Profesór na’in-sanulu (10) hala’o hela estudante iha Tailándia. Sira sei ramata iha tinan-ne’e. Bainhira filamai sira sei bá ajuda atu hanorin,” nia informa.
Jornalista: Osória Marques
Editór: Xisto Freitas da Piedade
