DILI, 16 Janeiru 2026 (TATOLI)—Ministru Planeamentu no Investimentu Estratéjiku (MPIE), Gastão Francisco de Sousa, hateten ohin Governu hala’o enkontru espesiál ho investór sira husi Xina no Singapura, ne’ebé atu investe iha área agrikultura, finansa no iha área Aviasaun nian.
“Tantu iha área agrikultura iha produtu balun ne’ebé investór sira aprezenta, liuliu kona ba espésie hirak ne’ebé nia poténsia ba buat barak, hanesan fó hahan ba ita-nia animál sira no bele prodús produtu mós produtu balun,” Ministru Planeamentu no Investimentu Estratéjiku (MPIE), Gastão Francisco de Sousa, hateten ba jornalista sira iha Gabinete Fronteira Marítima, Palásiu Governu, ohin.
Investór sira mós aprezenta iha área aviasaun no investimentu finansiál nian, oinsá atu haree ba oin liuliu hanesan Governu estabelese ona Banku Dezenvolviementu Nasionál, nune’e sira sei haree hamutuk prosesu ba oin liuliu ba sira-nia partisipasaun iha dezenvolvimentu setór finanseiru hodi bele ajuda Timor-Leste.
“Entaun ita bele haree saida mak Governu Timor-Leste bele aproveita husi aprezentasaun ohin no Primeiru-Ministru fó ona orientasaun atu Ministériu Finansa, Ministériu Koordenadór Asuntu Ekonómia no Ministériu Obra Públika atu ajusta saida mak bele ajuda ita iha área sira-ne’e,” nia hateten.
Reprezentante ekipa delegasaun investór, Michael Ong, hato’o agradesementu ba Primeiru-Ministru, Vise-Primeiru-Ministru sira no Ministru sira nia partisipasaun.
“Entaun ami kontente tanba ami konsege konvida Profesór Ling husi Xina mai ajuda ho teknolojia, teknolojia Jintao, kona-ba ajuda hasa’e povu hirak ne’ebé ki’ak iha ne’e no ajuda populasaun iha Timor-Leste,” nia dehan.
Nia hatutan sira mós iha investór Rudy Huang ne’ebé sei investe kona-ba aviasaun, nune’e sira sei halo diskusaun ho empregadór Aero Dili inklui halo investimentu iha indústria aviasaun.
“Ami iha mós investór Terence Wong husi Hong Kong, ne’ebé hela ezamina mikro finansa iha ne’e, ne’ebé sei servisu besik ho Ministériu Finansa,” nia hateten.
Governu liuhusi Primeiru-Ministru, Xanana Gusmão, akompañadu husi Vise-Primeiru-Ministru Asuntu Ekonómiku, Francisco Kalbuadi Lay inklui Ministra Finansa, Santina Cardoso, Ministériu Planeamentu no Investimentu Estratéjiku, Gastão Sousa no Vise-Ministru Obra Públika, Júlio do Carmo, hala’o enkontru ho investór internasionál husi Xina no Singapura.
Jornalista : Alexandra da Costa
Editór : Cancio Ximenes
