DILI, 27 Abríl 2026 (TATOLI)—Ofisiál Superiór na’in-11 Polísia Nasionál Timor-Leste (PNTL), Segunda ne’e, simu pose hodi asume responsabilidade iha Komandu Jerál.
Komandante Jerál PNTL, Komisáriu Asistente Polísia Afonso dos Santos no Segundu Komandante PNTL, Komisária Asistente Polísia Natercia Eufrásia Soares Martins halo nomeasaun no fó pose ba Ofisiál Superiór na’in-11.
Hafoin serimónia pose, Komandante Jerál PNTL, Komisáriu Asistente Polísia Afonso dos Santos, parabeniza emposadu Ofisiál Superiór sira no husu atu kontinua hala’o serbisu ho responsabilidade hodi hatudu disiplina no sai ezemplu di’ak ba membru Polísia hotu hodi hametin relasaun di’ak ho komunidade no lideransa komunitáriu ho Autoridade Munisípiu no Veteranu sira hotu atu garante estabilidade seguransa ba komunidade iha munisípiu ho di’ak.
“Ha’u-nia lia-menon mak ne’e, sai Komandante munísipiu no Segundu Komandante Munisípiu no asume kargu xefia mak ne’e, imi tenki hatudu ezemplu di’ak ho disiplina ba membru PNTL hotu atu hametin relasaun di’ak ho komunidade ida baze, liuliu Líder Komunitáriu ho Autoridade Munisípiu, Veteranu, Relijiozu sira no sosiedade sivil atu garante estabilidade pás ho hakmatek iha territóriu Timor-Leste,” Komisáriu Asistente Polísia Afonso dos Santos, hateten ba Jornalista sira iha Kuartél Jerál PNTL, Kaikoli.
Notísia relevante : KomJer PNTL Afonso oferese estratejia lima ba membru hodi mellora instituisaun
Biban ne’e, nia husu ba Komandante PNTL Munisípiu sira hotu atu kontinua kumpre ba irarkia komandu no hala’o serbisu ho disiplina no kontrola membru hotu halo misaun serví no proteje garante seguransa estabilidade pás ho hakmatek ba komunidade iha territóriu Timor-Leste.
Ofisiál Superiór PNTL sira ne’ebé simu pose ba kargu xefia hanesan Komadante Munisípiu no Segundu Komandante Munisípiu mak hanesan Komandante PNTL Munisípiu Aileu lidera husi Superintendente Xefe Polísia António da Luz, Komandante PNTL Munisipiu Manufahi lidera husi Superintendente Xefe Polisia Marcos Sequeira Nunes, Komandante PNTL Munisípiu Kovalima lidera husi Superintendente Xefe Polísia Paulino Carmo Pereira.
Enkuantu, Segundu Komandante PNTL Munisípiu Vikeke lidera husi Superintendente Polísia José Casemiro de Carvalho, Segundu Komandante PNTL Munisípiu Likisá lidera husi Superintendente Asistente Polísia Mateus da Costa Texeira no Segundu Komandante PNTL Munisípiu Manatutu Miguel Soares de Araújo.
Iha biban ne’e, Komandante Jerál PNTL, Komisáriu Asisténte Afonso dos Santos nomea no fó pose mós ba Ofisiál Superiór PNTL sira atu asume kargu Xefia iha Departamentu Komandu Jerál PNTL mak hanesan Xefe Departamentu ba Pesoál formasaun lidera husi Superintendente Polísia Grasiano Moniz Amaral, Xefe Departamentu Protesaun no Natureza ba Ambiente lidera husi Superintendente Polísia Inacio Amaral, Xefe Departamentu Finansa no Orsamento lidera husi Superintendente Polísia Helena das Dores Alves, Xefe Departamentu Polisiamentu Komunitáriu lidera husi Superintendente Asistente Polisia Domingos Sarmento Gama no Xefe Depaprtamento Aprovizionamentu interinu lidera husi Inspetór Xefe Adelberto Mau.
Jornalista : Natalino Costa
Editora : Julia Chatarina
