DILI, 10 Juñu 2026 (TATOLI)–Nagardjo FC taka Liga Futeból Timor-Leste (LFTL) Segunda Divizaun époka 2026 hetan vitória hafoin dudu-sees Vila Atauro 3-1 iha jogu ikus ne’ebé hala’o iha Estádiu Munisipál Dili, kuarta kalan.
Hafoin árbitru Bernardinho Mascarinhas huu árvitu, ekipa rua hatudu kedas futeból ofensivu. Nagardjo ho Vila Atauro la hakfodak ba malu, sira hatene katak jogu ne’e atu kompleta de’it jogu iha grupu B nian tanba pontu la muda ona no destinu promosaun nian laiha ona.
Kontra-atake entre ekipa rua la’o manas liu, iha minutu 31, golu dahuluk husi Nagardjo akontese hahú husi jogadór Arquenino Marques (17) hodi aproveita bola barullu iha lina oin Atauro nian no lansa xutu ho kalma, bola haknuuk-an iha rede laran hodi muda rezulradu 1-0.
Adeptus atus ba atus selebra golu ne’e, hakilar ho lian oioin iha tribun leten Estádiu Munisipál Dili.
Vila Atauro mós la nonok. Sira nafatin fiar malu no nafatin luta, tanba futeból luta koletivu la’ós luta individual ema ida nian. Nune’e buat hotu nakfilak iha minutu 44, kontra-atake lalais, husu jogadór Nasario Sarmento (21) konsege prodús golu muda rezultadu ba 1-1.
Husi golu ne’e mak termina minutu ikus ba jogu primeira parte nian. Bibani da ba jogadór ekipa rua atu hamaran kosar no haloot hikas iis, hafoin kontinua ba jogu segunda partete.
Bainhira tam aba segunda parte, Atauro halo presaun ne’ebé maka’as tanba treinadór Salomão Soares halo mudansa ba tatika jogu, muda jogadór sira husi lina ida ba lina seluk, nune’e halo jogu ne’e hetok iha rítmu jogu ne’ebé bonitu.
Mudansa ne’e la hela de’it hanesan mudansa, basá iha minutu 66, jogadór mediu husi Nagardjo domina bola lansa kruza husi parte karuk, avansadu Avrely Suebu (9) simu kedan bola no marka tama liu ba rede Atauro nian, nune’e rezulatdu 2-1 ba Nagardjo.
Golu ne’e halo Nagardjo nja jogu sai manas liután. Atauro halo presaun maibé labele domina bola iha parte klaran. Nune’e Nagardjo utiliza oportunidade iha minutu 70, Avrely Suebu mosu fali lansa xutu halo rede nakdoko no taka ho eskor 3-1.
Vila Atauro tenta responde liuhusi bola aas, maibé defeza Nagardjo lidera husi kapitaun Ricardo de Araujo (23) kontrola ho di’ak to’o tempu ba Segunda parte termina.
Ho vitória ne’e, Nagardjo FC taka époka ho pontu 5 husi jogu 4 no lori Nagardjo okupa fatin iha pozisaun 3 iha Grupu A. Vila Atauro hela ho pontu 1 iha tabela klasifukasaun ne’ebé ninin liu.
Maske ekipa rua la konsege hetan billete ba Primeira Divizaun tinan ne’e, maibé AD Santo António ho FIEL FC mak sei hadau malu sé mak manán nia sei promove ba Primeira Divizaun tanba ekipa rua ne’e mak pontu boot liu.
Ekipa Vila Atauro
Obadias do Carmo (99), Ronaldinho Gusmão (20), Noel dos Santos (12), Aristides Soares (22) Andrias Kayoi (2), Nando Tebai (8), Yosmus Dodai (11), Graciano Sarmento (5), José Fino Gusmão (4), Jonata Marques (26), Narcisio Sarmento (2 1).
Jogadór Suplente
Bendito Vila Nova (77), Ricardo de Araujo (23), Wilson dos Santos (3), Yenium Enumbi (13), Teofilo Lima (9), Manajes Gomes (14), Osvaldo da Costa (24), Jacson do Rego (19), Leofigildo Barbosa ( 18), Silvestre Xavier (16), Agusto Soares (17), Jacinto de Carvalho (10), Helio Soares (15), Hasan Ramos (7).
Ekipa Nagardjo
Vicente Baredes (28); José da Costa (18), Husen Costa (25), Dramicio Morreira (15), Bernardino de Sena (12); Herman Yoku (6), Custodio dos Santos (24); Richi Wally (10), Jorge Alves (7), Avrely Subeu (9), Quenino Marques (17).
Jogadór Suplente Suplente
Valdinho Mouzinho (1), Pedro Belo (19), Domingos Ribeiro (2), Albertinho Ribeiro (14), Rifabiano da Conceição (23), Silvestre Gama (13), Yohan Woppi (8).
Jornalista : Hortêncio Sanchez
Editór : Cancio Ximenes
