VIKEKE, 13 Maiu 2026 (TATOLI)—Autoridade Postu Administrativu Uatulari, Munisípiu Vikeke, hahú prepara eatudante husi Ensinu Sekundáriu Filiál Veteranu Uatulari hamutuk na’in-50 hodi sai ekipa isár bandeira ba komemorasaun loron Restaurasaun Indenpendésia RDTL ba da-24 (20 Maiu 2002-20 Maiu 26).
Prezidente Komisaun Organizadora ba komemorasaun 20 Maiu, Armindo Guterres haktuir, kona-ba preparasaun komemorasaun 20 Maiu ne’e, nivel Postu Administrativu Uatulari realiza iha Suku Makadike de Baixo daudaun ne’e komisaun prepara ona fatin ba isár bandeira, ai-riin ba bandeira nian.
“Ami mós komisaun prepara ona ita-nia estudante hamutuk na’in-50 ne’ebé membru Polísia Nasionál Timor-Leste (PNTL) Eskuadra Uatulari fó treinamentu ba estudante sira kona-ba parada isár bandeira maski oras-ne’e tempu udan,” Armindo ba TATOLI iha Postu Administrativu Uatulari, Kuarta ne’e.
Nia hatutan komemorasaun ne’e mós komisaun sei organiza moradór sira husi kada suku hodi partisipa iha komemorasaun ne’e.
Armindo esplika orsamentu ba komemorasaun ne’e hamutuk $1.000,00 hodi aloka ba dekorasun, sasán lojístika no konsume nian.
Iha oportunidade ne’e, komisaun organizadora apela ba populasaun Uatulari partisipa iha serimónia ne’e.
Entretantu, tema jerál ba komemorasun loron ne’e mak “Hamutuk ita sei harii pátria ne’ebé justa, inkluziva no reziliente liután”.
Jornalista: Vitorino Lopes da Costa
Editór: Xisto Freitas da Piedade
