DILI, 13 Maiu 2026 (TATOLI) –Timor-Leste sei sai uma-na’in ba eventu internasionál Dili Regional Cooperative Ministers Meeting 2026 (DRCMM) ne’ebé sei realiza iha Outubru 2026 ho tema “Empowering Communities, Connecting Nations”.
Asesór Tékniku no Koordenadór Sekretariadu DRCMM 2026, Leovogildo Belarmino, dehan iha inísiu SEKoop fó sai ona katak Timor-Leste sei sai uma-na’in ba eventu internasionál ho naran ASEAN Cooperative Ministerial Meeting ne’ebé tuir planu sei organiza iha Dili, iha Juñu 2026, no sei partisipa husi nasaun membru Asosiasaun Nasaun Sudeste Aziátiku (ASEAN).
Maibé, hafoin halo enkontru, muda tiha naran ne’ebé antes deside ba fali DRCMM ho razaun tanba Timor-Leste seidauk tama ba Sectoral Bodies ASEAN, ne’ebé foka ba grupu traballu ka konsellu ministeriál ida ne’ebé kompostu husi governante/ministru sira ho pozisaun aas husi setór espesífiku sira iha nasaun membru ASEAN nian.
Sira iha knaar atu koordena implementasaun projetu no polítika espesífiku sira iha pilár prinsipál tolu: Polítika-Seguransa, Ekonómiku, no Sosiokulturál.
Tuir nia, maski naran ba eventu mak muda, maibé konteúdu husi atividade nafatin tanba konvida ministériu sira husi ASEAN ne’ebé ninia portfóliu ne’e iha kooperativa hodi mai hamutuk realiza atividade ne’e.
“Ita-nia preprasaun tomak ba eventu ne’e agora kuaze 50% tanba buat hotu la’o di’ak. Ita-nia nota konseitu mós finaliza ona, hein aprovasaun husi Primeiru-Ministru ho Ministru Asuntu Koordenadór Asuntu Ekonómiku. Ita-nia draft karta sira ne’ebé atu haruka ba ministru sira iha ASEAN ne’e mós prepara hotu ona, hein distribui ba sira”, Leogildo Belarmino hateten ba Tatoli iha nia knaar-fatin iha Akait, ohin.
Nia hateten antes karta sira ne’e haruka ba ministru membru ASEAN nian, sei envia karta uluk ba Sekretariadu ASEAN iha Jakarta, nune’e bele informa ona ba ministru sira iha nivel ASEAN atu sira bele haree ona sira-nia tempu.
Dili Regional Cooperative Ministers Meeting 2026 sei hala’o durante loron lima, iha ne’ebé loron rua mak efetivu tanba uza ba diálogu, no sesaun plenária sira ko’alia kona-ba kooperativa ninian dezenvolvimentu iha ASEAN no ministru sira sei aborda asuntu sira ne’ebé liga ho ASEAN Economic Blueprint. Ida-ne’e planu ne’ebé eziste kedas husi ASEAN, ne’ebé sai hanesan roteiru ida atu atinje.
Iha mós atividade han kalan hamutuk ne’ebé sei realiza iha Palásiu Nobre Lahane, Dili, ne’ebé iha eventu ne’e sei konvida Prezidente Repúblika Ramos-Horta no Primeiru-Ministru Xanana Gusmão atu partisipa diretame iha abertura ba eventu ne’e.
Kona-ba preparasaun expo ne’e rasik, daudaun iha hela identifikasaun produtu potensiál sira Timór nian ne’ebé atu aprezenta. “Produtu sira ne’e mak hanesan kafé, baunilla, Bafo Kayrala no seluk tan. Ita mós sei serbisu hamutuk ho Kámara Komérsiu no Indústria Timor-Leste, Asosiasaun Emprezariál Feto Timor-Leste, hodi konvida Mikro, Pekena, Média Empreza, haree sira-nia produtu ne’ebé prodús di’ak ona no halo esportasaun ruma bele lori mai partisipa iha expo ne’e”, nia dehan.
Eventu ne’e sei sai plataforma importante ida hodi promove kapasidade kooperativa lokál sira iha merkadu internasionál, liuliu ba produtu prosesadu no produtu sira ne’ebé iha ona valór derivadu. Expo ne’e rasik planeia sei hala’o durante loron lima iha Sentru Konvensaun Dili.
Kona-ba akomodasaun ba bainaka sira, daudaun sei iha koordenasaun nia laran, maibé iha lista planu otél ne’ebé sei prepara mak hanesan Palm Spring, Otél Timór, Otél Novu Turizmu, no Timor Plaza, tanba ema mai ho nia ekipa. Kona-ba eventu ne’e SEKoop prevee orsamentu hamutuk rihun $614.
Notísia relevante: SEKoop kria sekretariadu no komisaun ba eventu ASEAN Cooperative Ministerial Meeting iha TL
Jornalista: Arminda Fonseca
Editora: Maria Auxiliadora
