DILI, 14 Maiu 2026 (TATOLI)-Vise-Ministru ba Asuntu Parlamentár, Adérito Hugo da Costa, informa iha reuniaun líder bankada parlamentár kona-ba preparasaun Governu nian ba proposta Orsamentu Retifikativu (OR) ne’ebé sei submete ho karáter urjénsia.
Iha reuniaun Konsellu Ministru (KM) horisehik aprova ona OR ne’ebé aprezenta husi Ministra Finansa no agora iha faze preparativu dokumentu sira no lais liu lokraik ne’e ou aban submete ba órgaun lejizlativa ne’e.
“Ohin, reuniaun líder bankada mós, Prezidente Parlamentu ho Xefe Bankada sira husu kona-ba preparasaun Orsamentu Retifikativu. Ne’ebé, ha’u aprezenta ona ba”, nia hateten ba jornalista sira hafoin sorumutu líder bankada parlamentár iha Parlamentu Nasionál.
Lembra katak, iha 13 Maiu, Governu liuhusi Konsellu Ministru aprova ona projetu Proposta Lei, ne’ebé aprezenta husi Ministra Finansa, Santina Cardoso, ba alterasaun dahuluk Lei númeru. 8/2025, loron 27 fulan-Novembru, kona-ba Orsamentu Jerál Estadu (OJE) ba tinan 2026.
Proposta ne’e prevee ajustamentu ida ba OJE 2026 hodi hatán ba aumentu husi folin kombustivel internasionál, relasiona ho konflitu iha Médiu Oriente, kustu ne’ebé mosu husi ezersísiu husi Prezidénsia Pro Tempore Komunidade País Lian Portugés (CPLP, sigla portugés) nian ne’ebé asume husi Timor-Leste hafoin aprovasaun OJE 2026, nune’e mós despeza sira ne’ebé relasiona ho Rejiaun Administrativu Espesiál Oekusi Ambenu.
Ho alterasaun ida-ne’e, montante konsolidadu husi OJE 2026 aumenta maizumenus millaun $101,1 sa’e ba billaun $2,39. Aumentu ida-ne’e la’ós rezultadu reforsu transferénsia ruma husi Fundu Petrolíferu, maibé liuliu reajustamentu husi fonte finansiamentu Estadu nian, liuhusi utilizasaun saldu jerénsia, saldu ne’ebé disponivel iha konta bankária ne’ebé la efetiva (ne’ebé la uza), no mós reforsu husi reseita doméstika sira.
Proposta Orsamentu Retifikativu ho objetivu atu hamenus impaktu ekonómiku husi aumentu folin kombustivel internasionál, iha kontestu dependénsia maka’as ba importasaun, liuliu kombustivel no produtu ai-han, ne’ebé afeta diretamente kustu transporte, no mós inflasaun doméstika.
Tuir projesaun husi Ministériu Finansa, maski iha aumentu iha folin kombustivel nian iha nivel internasionál, prevee katak média inflasaun anuál iha tinan 2026 sei sa’e ba 2,2%, kompara ho 1,2% iha tinan 2025, lahó aumentu ne’ebé signifikativu, tanba medida sira ne’ebé Governu adota hodi estabiliza folin kombustivel.
Jornalista: Nelson de Sousa
Editora: Maria Auxiliadora
