OEKUSI, 14 Maiu 2026 (TATOLI) – Institutu Nasionál Kombate HIV-SIDA, Institutu Públiku (INCSIDA, I.P sigla-Portuges), hala’o atividade semináriu hodi partilla informasaun kona-ba tranzmisaun vírus HIV-SIDA ba forsa destakadu sira hanesan F-FDTL no PNTL iha sub Rejiaun Administrativa Espesiál Oekusi Ambenu (RAEOA).
“Autoridade husi PNTL no F-FDTL, sira mós presiza rona informasaun, tanba ita ema hotu iha iha risku ba seksuál livre ne’e, ne’ebé presiza iha koñesimentu loloos, seguransa sira balun serbisu iha liña fronteira, entaun presiza iha koñesimentu oinsá atu hadook an husi vírus ne’e, tanba vírus ne’e ai-moruk laiha, entaun ita-nia forsa sira importante liliu F-FDTL no PNTL, sira tenke iha koñesimentu loloos oinsá atu prevene-an husi vírus ne’e,” Prezidente INCSIDA, I.P, Daniel Marçal, hateten iha ámbitu atividade divulgasaun informasaun iha salaun Álfandega Palaban, kinta ne’e.
Nia apela, husu apoia ba seguransa sira, atu identifika fatin sira-ne’ebé deskonfia prátika sexuál livre iha rai laran.
Aleinde ne’e, Daniel Marçal mós apela ba forsa seguransa sira atu ajuda identifika fatin sira ne’ebé suspeitadu hala’o prátika seksuál livre.
“Ita hamutuk atu haree asuntu ne’e ho sériu, matan moris neon-na’in, fatin sira barak, oras ne’e fasilita hela seksuál livre ba alin joven sira, ita mai ko’alia nafatin, atu ema hotu uza konsiénsia, maibé la fasíl atu muda ema nia karatér no emosaun seksuál, tanba ne’e husu atu hamutuk salva ita-nia rai, deteta fatin seksuál livre, atu bandu labele halo prátika livre,” nia apela.
Importánsia étika no morál
Iha fatin hanesan, reprezentante Prezidente Autoridade RAEOA, Joao Bano Suni agradese INSCIDA, tanba partilla informasaun kona-ba prevene tranzmisaun vírus HIV ba komunidade sira iha Oe-kusi kobre rejiaun Oésilo no Pante Makasar.
Nia konsidera, semináriu ne’e, envolve komunidade sira no membru PNTL F-FDTL inklui estudante no funsionáriu sira, importante tebes, nune’e bele partilla informasaun atu hasa’e koñesimentu.
“Tanba hanesan ema hotu hatene katak moras HIV ne’e, husi ema ida-idak nia atitude, pensamentu no hahalok. Ida-ne’e kontribui hodi bele lori ema monu ba moras refere. Entaun, liga ba étika morál ne’e, ita presiza reforsa nafatin liliu inan-Aman, Autoridade no parte igreja, atu fahe informasaun barak, depois bele koloka nia aan iha sosiedade ne’ebe maka moris kahur malu, ne’ebé balun hetan ona moras ne’e, maibé la fó sai ba profisionál saúde sira, maibé nonok de’it, entaun bele fahe lalais moras ne’e ba ema seluk,” nia hateten.
Notísia relevante:INSCIDA sensibiliza komunidade RAEOA kona-ba prevensaun HIV-SIDA
Iha oportunidade hanesan, Estudante UNPAZ Oekusi, Elfrida Colo rekoñese importánsia informasaun husi INCSIDA kona-ba oinsá prevene tranzmisaun vírus HIV-SIDA iha RAEOA.
“Informasaun di’ak ba ami joven, kona-ba moras HIV-SIDA, nune’e labele estraga ami-nia futuru. Nu’udar joven ita tenke prevene ita-nia saude, no kuidadu aan hodi labele monu ba lasu, no afeta ba moras HIV-SIDA nian,” nia hateten.
Jornalista: Abílio Elo Nini
Editór: Rafael Ximenes de A. Belo
