DILI, 14 Maiu 2026 (TATOLI)–Primeiru-Ministru (PM), Kay Rala Xanana Gusmão, hateten, komemorasaun Restaurasaun Independénsia Timor-Leste ba dala-24, iha 20 Maiu tinan ne’e, hanesan momentu importante atu lembra filafali luta no sakrifísiu povu timoroan sira hodi hetan ukun-an.
Xanana dehan, loron importante ida-ne’e hanoin hikas loron 20 Maiu 2002 bainhira Timor-Leste restaura ofisialmente nia independénsia hanesan Estadu soberanu.
Iha tinan 2026, komemorasaun ba dala-24 lori signifikadu boot hanesan valoriza veteranu no mártir sira ne’ebé luta ba libertasaun, haforsa unidade nasionál, no reflete kona-ba dezenvolvimentu nasaun durante tinan-24 independénsia.
“Reflesaun importante ida mak independénsia la’ós de’it kona-ba liberdade husi okupasaun, maibé kona-ba kapasidade atu harii nasaun ida-ne’ebé justu, forte no fó oportunidade ba ema hotu, tinan 24 ne’e sai tempu atu avalia buat ne’ebé konsege ona no buat ne’ebé presiza hadi’a ba jerasaun tuir mai,” Xanana hateten hafoin ramata enkontru semanál ho Prizidente Repúblika, José Ramos-Horta, iha Palásiu Prezidensiál, Kinta ne’e.
Notísia relevante : Xanana: “Ha’u mak restauradór Independénsia ne’e sala”
Nia hatutan, durante tinan 24 independénsia, Timor-Leste konsege halo ona buat barak hanesan kria estabilidade polítika, konstrusaun instituisaun Estadu, edukasaun, saúde no infraestrutura balun. Maibé rekoñese mós katak iha área importante balun ne’ebé komunidade sente katak seidauk halo di’ak ka seidauk kompletu.
Tanba ne’e, presiza liu mak espíritu produtividade, servisu no responsabilidade hamutuk.
Jornalista : Hortêncio Sanchez
Editora : Julia Chatarina
