DILI, 14 Maiu 2026 (TATOLI) – Projetu konstrusaun Timor Marina Square (TMS) lokaliza iha área Lesidere, Dili, sei finaliza molok 2029, tanba nu’udar parte ida atu apoia Timor-Leste nia preparasaun lidera ba Prezidénsia ASEAN iha 2029.
Diretór-Ezekutivu TradeInvest Timor-Leste, Duílio Marino Gusmão Araújo da Silva, hateten projetu ida-ne’e kontinua hatudu progresu pozitivu no hein atu sai hanesan símbolu ba modernizasaun kapitál nian bainhira Timor-Leste prepara ba ninia papél estratéjiku iha sudeste aziátiku.
“Timor Marina Square nia serbisu daudaun la’o hela, no ita haree progresu la’o di’ak tebes. Tuir estimativa antes 2029 ramata finaliza ona, tanba sira mós hakarak atu responde ba iha 2029 ita lidera ASEAN”, Duílio Marino hateten iha ámbitu Programa Bainaka Kredivel, iha Akait, ohin.
Tinan 2029 nu’udar hanesan tinan ida ne’ebé importante ba Timor-Leste, tanba nasaun ne’e projeta atu kaer nia Prezidénsia ASEAN dahuluk hafoin sai membru plenu ba organizasaun rejionál ne’e.
Timor Marina Square rasik hetan ona lisensa ambientál dahuluk husi Autoridade Nasionál Lisensiamentu Ambientál (ANLA) hodi hahú konstrusaun projetu turizmu ida iha Lecidere, Dili, iha loron 01 fulan-Marsu 2024.
Projetu ne’e lidera hUsi empreza Singapura nian, lansa ho serimónia inaugurasaun ida iha loron 17 fulan-Maiu 2022, no aplika kedas ba lisensa ambientál ida, ne’ebé la hetan aprovasaun to’o tinan 2024.
Projetu Timor Marina Square simu ninia sertifikadu Deklarasaun Benefísiu iha loron 23 Novembru 2021. Empreza ne’e skonstrui arranha-céu luxu rua iha área Lecidere, ho valór millaun $50.
Projetu ne’e dezenvolve husi konsórsiu internasionál ne’ebé kompostu husi A-Smart Property Holdings Pte Ltd no Vico Investment (Timor) Pte Ltd husi Singapura, hamutuk ho EMG Group husi Timor-Leste.
Timor Marina Square harii iha rai mais ou menus metru kuadradu 3.200 no kompostu husi torre rua, andar 19 no 23. Área ne’e sei iha espasu eskritóriu, sentru komersiál, restaurante sira, apartamentu sira ho servisu, apartamentu rezidensiál sira, no instalasaun sira konferénsia internasionál nian.
Ninia lokalizasaun iha sentru Dili, besik eskritóriu Governu nian no embaixada estranjeiru sira, konsidera hanesan estratéjiku atu apoia atividade ekonómika, diplomasia, no turizmu negósiu iha futuru.
Torre eskritóriu sira sei fornese espasu ba empreza multinasionál sira no eskritóriu Governu nian, enkuantu torre rezidensiál sira sei fornese apartamentu modernu sira kompletu ho amenidade sira hanesan pixina infinita, sentru fitness, área BBQ, área halimar labarik sira nian, no paizajen verde sira.
Aleinde konseitu dezenvolvimentu ne’ebé modernu, projetu ne’e mós fó énfaze ba sustentabilidade ambientál liuhusi sistema jestaun lixu rasik, utilizasaun espasu verde sira, no integrasaun elementu kulturál lokál timoroan nian iha edifísiu nia dezeñu arkitetóniku no interiór.
Dezenvolvedór ne’e mós hahú oferese tipu propriedade oioin ba investidór sira no públiku, hahú husi apartamentu kuartu ida ho folin inísiu $123,000 to’o unidade komersiál sira ho valór liu millaun $1.
Prezensa Timor Marina Square hein atu hasa’e imajen moderna sidade Dili nian, hasa’e ninia atratividade ba investimentu estranjeiru, no reforsa prontidaun infraestrutura no instalasaun apoiu nian ba knaar Timor-Leste nian iha futuru nu’udar Prezidente ASEAN.
Notísia relevante: Governu no empreza hatuur fatuk dahuluk ba konstrusaun Marina Square
Jornalisra: Arminda Fonseca
Editora: Maria Auxiliadora
