DILI, 15 Maiu 2026 (TATOLI) – Provedoria Direitu Umanu no Justisa (PDHJ, sigla portugés) la konkorda ho desizaun Prezidente Repúblika, José Ramos-Horta, atu fó indulta ba eis-padre Richard Daschbach, ne’ebé nia naran tama mós iha lista indultu tinan ne’e.
“Kuaze kada tinan eis-padre Richard nia naran tama hela de’it iha lista indultu. Ami hateten katak laiha razaun atu fó indultu ba ema pedofilia ida, tanba pedofilia ho pornografia infantíl ne’e la’ós baibain maibé krime grave”, Provedór Direitu Umanu no Justisa, Virgílio Guterres, hateten ohin.
Nia lembra katak iha tinan kotuk mós nia naran tama iha lista indultu no bainhira PDHJ haree no bá hasoru malu ho Prezidente Repúblika ho informalmente fó hanoin katak, provedór laiha kompeténsia atu halo intervensaun iha desizaun Prezidente Repúblika nian, maibé se bele rona hanoin husi vítima ka reprezentante vítima nian.
“Ami apresia tebes tanba iha tinan kotuk Prezidente Repúblika bele fó espasu atu rona hanoin husi vítima no reprezentante vítima nian, ne’ebé ikus mai la fó indultu. Maibé tinan ida-ne’e mosu tan fali. Husi parte PDHJ laiha razaun morál atu fó indultu ba eis-padre ne’e, tanba to’o agora nia seidauk rekoñese no arrepende nia sala, no husu deskulpa ba vítima sira”, nia lamenta.
Hodi salienta katak loloos ne’e Tribunál fó pena tinan 20 ba nia, maibé tanba katuas ona mak hatún tiha pena ba de’it tinan 12.
“Oportunidade ne’e ha’u hakarak fó hanoin ba Prezidente Repúblika katak dala-ida tan rona vítima sira-nia hanoin, nune’e ita labele fó presedente ne’ebé ladi’ak, tanba ida-ne’e hakanek vítima sira-nia fuan. Tanba indultu ne’e, iha ita-nia liafuan karik Estadu atu fó deskulpa ida ba nia”, nia hato’o.
Notísia relevante: Arkidioseze Dili afirma nia posizaun ba kazu eis-padre Richard Daschbach
Jornalista: Arminda Fonseca
Editora: Maria Auxiliadora
