DILI, 01 Maiu 2026 (TATOLI) – Autoridade Aduaneira (AA/Alfándega) rekruta funsionáriu foun na’in-80 iha tinan ne’e hodi reforsa serbisu instituisaun nian, liuliu halo atendimentu no inspesaun iha pontu entrada sira.
Komisáriu AA, Joanico Pinto, informa prosesu rekrutamentu agora tama ona ba faze avaliasaun dokumentu husi ekipa júri no bainhira remata, kandidatu sira tenke tuir formasaun fulan tolu to’o lima hafoin mak halo destakamentu ba fatin sira ne’ebé iha.
“Sira na’in-80 ne’e sei integra iha rejime jerál Funsaun Publika nian. Ita presiza duni funsionáriu tanba daudaun ne’e Alfándega iha pesoál 252, maibé balun reforma ona, balun iha faze atu reforma, no balun moras prolongada. Ita presiza duni rekursu umanu iha terrenu”, Joanico Pinto hateten ba Tatoli.
Nia dehan Timor-Leste sai ona ba membru ASEAN no Organizasaun Mundiál Komérsiu maka Alfándega nafatin halo kooperasaun ho parseiru sira hodi fó formasaun ba funsionáriu sira tantu iha rai-laran komu rai-li’ur.
Parseria sira ne’ebé Alfándega halo mak ho Indonesian Custom, Australian Border Force, Organizasaun Mundiál Komérsiu, Sekretariadu ASEAN, kona-ba capacity building.
“Ami hetan kooperasaun ida foin lalais ho Custom Japaun nian. Kooperasaun sempre nakloke tanba Alfándega ne’e aleinde ita halo serbisu tuir ita-nia rekimentu ka lei sira iha rai-laran, ita mós tenke kumpre nafatin boas prátikas sira mundiál nian”, Joanico Pinto esplika.
Nia subliña katak formasaun primeiru trimestre halo tiha ona, sei iha formasaun iha fulan Juñu-nia-laran no kontinua to’o fin anu.
“Normalmente, ami ko’alia ho parseiru sira labele iha duplikasaun programa formasaun. Ezemplu, Indonézia fó ona formasaun kona-ba treinamentu Post Clearance Audit, Austrália labele fó tan, maibé fó fali kona-ba Harmonized System Code, nune’e formasaun sira ne’e jere to’o tinan ida”, dehan.
Kona-ba formasaun iha rai-li’ur nian, tinan ne’e iha períodu dahuluk haruka ona ema na’in-12 bá Japaun hodi tuir formasaun durante semana rua kona-ba Post Clearance Audit no sira fila tiha ona.
Jornalista: Arminda Fonseca
Editora: Maria Auxiliadora
