VIKEKE, 19 Maiu 2026 (TATOLI)—Akontese klima udan boot iha fulan-Maiu ne’e mosu erosaun (rai halai) taka irrigasaun Daradau purvolta metru 80 nune’e labele distribui bee ba natar no barak mak daudaun ne’e sai maran iha Suku Vessoru, Postu Administrativu Uatulari, Munisípiu Vikeke.
Estensionista Suku Vessoru, Agostinho Fernandes, haktuir irrigasaun Daradau agora labele fornese bee ba natar tanba rai taka tomak ona kanál irrigasaun nian ne’ebé agrikultór sira preokupa tebes tanba natar balun abandonadu tanba bee laiha.
“Irrigasaun ne’e rai mak taka iha foin lalais udan boot ne’e. Ami ohin bá haree sukat kuaze metru 80 mak rai nakonu, entaun bee labele sulin tuir kanál,” Agostinho ba TATOLI iha Postu Uatulari, Tersa ne’e.
Nia dehan, agrikultór sira inisiativa bá ke’e maibé labele tanba rai taka nakonu, presiza ekipamentu pezadu mak bele halo normalizasaun irrigasaun ne’e.
Tuir dadus, natar parte Daradau purvolta ektare 340-resin mak daudaun ne’e abandonadu. Natar Daradau benefísia populasaun Suku Vessoru kompostu hosi aldeia hitu hanesan Balabasiba, Mau-Boru, Kulu-Dere, Baha-o, Uani-Uma, Baha-Buga no Matau ho totál populasaun 1.519, kompostu hosi mane 785 no feto 734.
Jornalista: Vitorino Lopes da Costa
Editór: Xisto Freitas da Piedade
