DILI, 20 Maiu (TATOLI)-Prezidente Repúblika (PR), José Ramos-Horta, seidauk foti desizaun ba lista indultu ne’ebé Governu aprezenta iha ámbitu komemorasaun Loron Restaurasaun Independénsia Timor-Leste ba da-24.
Xefe Estadu la lembra númeru lista prezu sira, maibé Prezidénsia Repúblika liuhusi Unidade Departamentu Jurídiku simu ona lista sira ne’e.
Tanba ne’e Xefe Estadu seidauk fó komentáriu kona-ba lista ne’e, inklui mós eis-Padre Richard Daschbach, ne’ebé kondenadu ho krime violasaun seksuál, tanba lista sira ne’e agora sei iha unidade jurídika.
“Seidauk iha ha’u-nia meza leten atu haree. Ha’u seidauk halo desizaun ruma. Hanoin aban ka bainrua karik”, nia hateten ba jornalista sira hafoin partisipa iha komemorasaun Loron Restaurasaun Independénsia iha Tasi-Tolu, ohin.
Atu foti desizaun, Ramos-Horta sei haree didi’ak ba asuntu balun bainhira dúvida maka sei konsulta mós ho parte Igreja no entidade sira seluk.
Aliende ne’e simu mós karta no mensajen husi sosiedade sivíl sira, nune’e lee no estuda didi’ak.
Xefe Estadu ne’e afirma katak atu foti desizaun sei haree mós ba kestaun balun hanesan razaun umanitáriu tanba moras, oan-ki’ak no seluk tan.
Notísia relevante:Provedoria Direitu Umanu diskorda fó indultu ba eis-padre Daschbach
Jornalista: Nelson de Sousa
Editora: Maria Auxiliadora
