DILI, 05 Juñu 2026 (TATOLI)—Primeiru-Ministru, Kay Rala Xanana Gusmão, sesta ne’e, hasoru malu ho Prezidente Repúblika, José Ramos-Horta hodi relata kona-ba Servisu Governu nian.
“Ha’u atualiza bá Prezidente kona-ba atividade Governu nian tomak iha semana ne’e nia laran. Konta mós ho desizaun importante sira-ne’ebé Governu halo inklui preparasaun ba aprezentasaun Orsamentu Jerál Estadu (OJE) tinan 2027 nian husi Ministériu sira,” PM Xanana hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Xanana dehan, enkontru ne’e mós hanesan parte husi mekanizmu koordenasaun entre órgaun soberania rua Estadu nian, ho objetivu atu asegura komunikasaun di’ak, estabilidade institusionál no armonizasaun polítika nasionál.
Líder na’in-rua diskute mós asuntu jerál sira relasiona ho situasaun nasaun nian, inklui prioridade governamentál, dezafiu dezenvolvimentu nasionál no nesesidade atu kontinua reforsa kolaborasaun entre Governu ho Prezidénsia.
Nune’e, parte rua reafirma kompromisu atu mantein estabilidade polítika, promove boa-governasaun no garante katak prosesu tomada desizaun Estadu nian la’o ho forma koerente no responsável.
Enkontru semanál entre Xefe Governu no Xefe Estadu konsidera hanesan espasu importante ida atu troka informasaun, armoniza vizaun nasionál no asegura katak interese povu Timor-Leste sai prioridade prinsipál iha polítika Estadu.
Jornalista : Hortêncio Sanchez
Editór : Cancio Ximenes
