DILI, 08 Juñu 2026 (TATOLI)—Konsellu Imprensa (KI) Timor-Leste, Segunda ne’e, realiza formasaun kona-ba “Feature Writing” ba jornalista nasionál hamutuk 19 iha salaun KI, Kintál Boot, Dili.
Formasaun ne’e hala’o durante loron lima, hahú husi loron 08-12 Juñu 2026 no fasilita husi antigu jornalista husi média TEMPO Indonézia no mós ativu hanesan formadór iha LPDS-Jakarta, Untung Widyanto. Formadór referidu iha ona esperiénsia iha área jornalizmu no hakerek notísia feature.
Prezidente Interina Konsellu Imprensa, Suzana Cardoso, hateten importánsia papél KI nian hodi hasa’e kapasidade jornalista sira atu prodús konteúdu jornalístiku ne’ebé kualidade no nakonu ho kriatividade hodi responde ba nesesidade públika nian.
Objetivu hosi formasaun ida-ne’e atu hasa’e jornalista sira-nia koñesimentu oinsá hakerek notísia feature ho faktu no presiza deskreve mós asuntu sosiál sira.
“Atu hateten katak durante ita-nia kobertura inklui ha’u aprezenta de’it faktu, maibé ita la deskreve asuntu sosiál sira,” Konselleira dehan iha abertura formasaun.
Nune’e, nia espera katak atividade ida-ne’e bele kontribui ba dezenvolvimentu kapasidade profisionál jornalista sira-nian no hasa’e kualidade produtu jornalístiku iha Timor-Leste, liuhusi pratika jornalizmu ne’ebé étiku, responsavel no orientadu ba interese públiku.
Iha biban ne’ebé hanesan, Formadór Untung Widyanto, hateten KI organiza treinamentu kona-ba hakerek feature ho objetivu atu hetan kobertura mídia barak liután iha Timor-Leste, bazeia ba abordajen notísia feature.
Nia dehan, notisia feature atu levanta kestaun ne’ebé eziste iha Timor-Leste, liuliu kona-ba povu nia moris loron-loron, problema saida maka akontese iha komunidade, atividade saida mak komunidade halo, buat sira-ne’e hotu bele foti iha hakerek notísia feature nian.
Nia fundamenta, jornalista labele hakerek de’it kona-ba membru Governu sira, maíbe jornalista tenke hakerek mós kona-ba retratu moris sosiedade nian.
“Iha aspetu interese umanu barak ne’ebé interesante atu hakerek, tanba ne’e ha’u introdús aprosimasaun jornalizmu konstrutivu. Jornalizmu konstrutivu mak jornalizmu ne’ebé la’ós de’it esplika no fó-sai problema, maibé mós fó solusaun saida mak bele ultrapasa ba problema sira-ne’e,” nia dehan.
Aleinde ne’e, nia mós husu ba jornalista atu forma ánglu no kria planu kobertura atu deskobre atmosfera iha sosiedade. “Ha’u husu sira (jornalista) atubele halo peskiza tuir pedidu kona-ba asuntu sosiál sira-ne’ebé ho kle’an ho estilu narrativa,” nia akresenta.
Jornalista nasionál 19 maihusi Ajénsia TATOLI, Radiu Televizaun Timor-Leste (RTTL), GMN, Jornál INDEPENDENTE, Timor Post, SAP News TL, Loluwari, Mídia Mudansa, Dili Post, Gardamor, Lafaek News no Hatutan.com.
Jornalista: Osória Marques
Editór: Xisto Freitas da Piedade
