DILI, 12 Juñu 2026 (TATOLI)—Governu liuhusi Ministériu Obra Públika (MOP) hamutuk ho Primeiru-Ministru, Kay Rala Xanana Gusmão, entrega xave sede ofisiál ba Organizasaun Juventude no Estudante Timor-Leste (OJETIL, sigla portugés) ne’ebé konstrui ona iha tinan-10 liubá.
Serimónia entrega xave ne’e ofisialmente husi Ministru Obra Públika, Samuel Marçal, ba Prezidente OJETIL atuál Primeiru-Ministru, Kay Rala Xanana Gusmão, hafoin entrega tutan ba Sekretáriu Jerál OJETIL, iha Lesidere, ohin.
Primeiru-Ministru, Kay Rala Xanana Gusmão, hateten fatin ida-ne’e la’ós atu hanorin maibé fatin ida-ne’e sei sai fatin ida-ne’ebé simu opiniaun, diskute loke hanoin atu haree saida mak Estadu presiza no nasaun presiza.
“Ne’e atu hatudu ba ita katak, ita bele hatais roupa kór oioin, maibé iha hanoin ida de’it atu dezenvolve Timor-Leste (rai ida-ne’e). Tenke ida de’it, entaun ida-ne’e mak halo ita labele fahe malu,” Primeiru-Ministru, Kay Rala Xanana Gusmão, hateten.
Xege Governu ne’e husu ba OJETIL atu fó hatene uitoan ba labarik sira kona-ba sira-nia avó sira-nia terus, atu sira bele hetan mós motivasaun atu aprende liután no loke sira-nia neon hodi buka hatene atu serví (saber para servir).
Loos duni, Xanana dehan, obra ida-ne’e tarde duni maibé esperansa la bosok, tanba ne’e mak hein to’o ohin loron ema hotu bele hasoru malu iha ne’e.
“Fatin ida-ne’e sei sai fatin ida atu entrega ba jerasaun foun ho kompromisu boot ba ita-nia rain, entaun kapaas tebes ho moto dehan saber para servir ne’e kapaas tebes,” Primeiru-Ministru Xanana hateten.
Xanana hateten, fatin ne’e la’ós de’it atu halo reuniaun ka enkontru maibé mai mós atu loke neon, tanba iha prosesu konstrusaun Estadu no nasaun la’ós paradu ka la’o mesak maibé timoroan mak tenke halo.
“Prosesu rua ne’e hamutuk mak bele fó benefísiu ba povu tomak kona-ba sentidu lolos ukun-an no valór lolos ba sira-nia sakrifísiu durante tinan-24,” PM Xanana apela.
Ministru Obra Públika, Samuel Marçal, hateten obra ida-ne’e halo kle’ur ona kuazé tinan 10 nia laran, prepara hotu ona atu entrega la entrega la’ós tanba problema seluk maibé tanba problema diferensa ideia entre membru sira iha OJETIL.
“Maibé ha’u fiar katak ohin ita entrega sede ida-ne’e ba OJETIL, atu sai hanesan uma lulik ida hodi halibur ita hotu-hotu liuliu ba belun rezisténsia sira-ne’ebé halibur malu iha OJETIL,” Ministru hateten iha nia diskursu iha sede OJETIL, Lesidere, ohin.
Governante ne’e dehan, fatin ne’e bele sai sede konsentrasaun atu fó ideia ba malu, maske ema hotu mai ho idea lahanesan maibé iha vizaun ida de’it katak hadomi Timor no hakarak rai ida ne’e la’o ba oin.
Sekretáriu Jerál OJETIL, José Manuel “Nakfilak”, hateten loos duni husi diferensa ideia mak halo atrazu ba obra ida-ne’e, maibé sira konsege jere diferensa ne’e sai tiha potensialidade ida atu konstrui uma ida ba juventude, atu nune’e hotu-hotu ne’ebé pertense ba iha funu ne’e bele sente katak finalmente hetan espasu ida.
“Espasu la’ós de’it atu halo enkontru maibé atu fó solusaun alternativa ba dezenvolvimentu ita-nia rain. Entaun lisaun ne’ebé uluk iha tempu rezisténsia ami aprende ohin loron ita tempu atu ami divulga ba joven sira,” Sekjer OJETIL ne’e dehan.
Atu divulga informasaun hotu, entaun presiza iha espasu, maibé ho esforsu Governu da-neen no da-sia nian, ohin loron sira bele realiza mehi ne’ebé durante ne’e planeia hela.
“Inisiativa ne’e sei kontinua metin tanba mós liafuan motivasaun husi Primeiru-Ministru, Kay Rala Xanana Gusmão, ne’ebé antes ne’e asume kna’ar hanesan Ministru Planeamentu Investimentu Estratéjiku ho liafuan ida katak “Husik hela imi-nia hakilar a luta continua maibé imi foku oinsá atu dezenvolve rai no povu ida-ne’e,” joven rezisténsia ne’e haktuir.
Liafuan ida-ne’e, nia dehan, metin iha sira-nia laran no ida ne’e sai hanesan orientasaun polítika ba joven sira hodi kontinua lori polítika ida-ne’e ba oin.
“Sede ne’e integra programa rua mak formasaun sidadania no ida fali mak formasaun atu harii agrikultura integradu, inklui debate buka solusaun, tanba konsiente katak membru OJETIL barak liu nia kbiit aas liu laiha ka nia só bele moris iha agrikultura,” nia informa.
Aleinde ne’e, organizasaun ida-ne’e sei responsável husi membru OJETIL hotu hodi dezenvolve planu no programa hodi másimiza ba oin no sei la entrega ba grupu ruma.
“Tanba ne’e, juventude sira iha tempu rezisténsia mak buka hadook-an ba malu tanba kór (partidu) ne’e sei halo ita sei labele hakat ba fatin ida,” nia afirma.
Sede ne’e, nia hateten, halo lansamentu fatuk dahuluk iha loron 24 fulan-Juñu 2016, konklui iha tinan 2018 no iha tinan 2026 foin entrega ofisiál ba OJETIL.
Jornalista : Alexandra da Costa
Editór : Cancio Ximenes
