DILI, 13 Juñu 2026 (TATOLI)—Prezidente Repúblika (PR), José Ramos-Horta, ho delegasaun to’o ona iha Aeroportu Internasionál Bunga Raya Complex Kuala Lumpur, Malázia, hafoin hala’o viajen ho Aero Dili husi Dili, Timor-Leste, Sábadu ne’e.
Hafoin to’o aeroportu internasionál, delegasaun Estadu ne’e simu ofisialmente husi guarda onra Malázia no Embaixadór Timor-Leste iha Malázia, Lisualdo Gaspar, molok lori ekipa delegasaun ba fatin deskansa iha W Hotel Kuala Lumpur.
Prezensa Xefe Estadu no delegasaun sira iha Malázia ho objetivu atu hala’o vizita traballu durante loron lima, 13-17 Juñu.
Tuir ajenda ne’ebé Agência TATOLI asesu, durante Xefe Estadu José Ramos-Horta nia vizita traballu maka hanesan tuirmai ne’e: Iha loron 14 fulan-Juñu, Prezidente Repúblika, José Ramos-Horta, sei hasoru malu ho Helen Todd, inan husi Kamal Bamadhaj, ba preparasaun hodi entrega medalla Orden Timor-Leste. No ajenda tuir fali mak sei hasoru malu ho Ilyumzhinov Kirsan iha W Hotel Kuala Lumpur.
Iha loron 15 fulan-Juñu, Xefe Estadu sei hasoru malu ho Chin Wei iha W Hotel. Hafoin ramata, Prezidente ho delegasaun sei kontinua kedas ba vizita Universidade Taylor’s Lakeside Campus, iha rua 1 Taylor’s, 47500 Subang Selangor. Iha oportunidade ne’e Xefe Estadu sei halo diálogu kona-ba “A change world, enduring values”.
Iha loron 16 fulan-Juñu, Prezidente Repúblika, José Ramos-Horta sei vizita ofisiál hodi halo enkontru kortézia ho Primeiru-Ministru Malázia, Dato ‘Seri Anwar Ibrahim, iha ninia fatin, Palásiu Governu Putrajaya.
Hafoin ramata enkontru ho Xefe Governu Malázia, Prezidente Repúblika ho delegasaun kontinua halo viajen bá otél Hilton, Kuala Lumpur, hodi halo lansamentu ba livru ho títulu “The Rising Sun: Timor-Leste’s Journey to Peace and Development” ka ho versaun tetun karik dehan” Loron-sa’e: Timor-Leste nia Jornada ba Dame no Dezenvolvimentu”. Iha oportunidade ne’e mós Prezidente Repúblika TL sei halo diskursu ofisiál kona-ba “Navigation turbulent times, pursuing peace”.
Enkuantu, iha loron 17 fulan-Juñu, Prezidente Repúblika ho ekipa delegasaun sei fila-hikas bá Timor-Leste ho aviaun Batik Air (OD372) no to’o iha Aeroportu Internasionál Nicolau Lobato Komoro iha tuku 07:30 Otl.
Jornalista: Alexandra da Costa
Editór: Xisto Freitas da Piedade
