DILI, 15 Juñu 2026 (TATOLI) – Konsellu Imprensa Timor-Leste kolabora ho ABC International Development (ABCID) hodi disponibiliza formasaun kona-ba Lideransa Sala Redasaun nian ba jerente mídia sira ho objetivu mak haforsa sira-nia kapasidade hodi hasoru dezafiu indústria jornalizmu nian ne’ebé kompleksu no dinámiku ba beibeik.
Formasaun ne’e hala’o entre loron 15 no 18 Juñu, iha GEM Institute, Palm Business and Trade Centre, Dili. Partisipante ba atividade ne’e hamutuk na’in-15, ne’ebé kompostu husi subeditór, editór, xefe redasaun, diretór informasaun, editór sénior, editór asosiadu sira, jerente notísia jerál, no jerente notísia sira.
Tékniku Formasaun Superiór iha Konsellu Imprensa Timor-Leste, Maria Bibel, esplika katak atividade ne’e dezeña atu hasa’e abilidade no konfiansa dirijente sira, nune’e bele lidera ho efetivu iha ambiente serbisu ne’ebé lais no kualidade.
“Formasaun ida-ne’e ho objetivu atu hametin abilidade lideransa husi xefe redasaun sira, nune’e bele jere sira-nia ekipa ho efetivu, harii kultura serbisu ne’ebé pozitivu, no foti desizaun editoriál sira ne’ebé étika no responsavel”, nia hateten.
Maria Bibel espera katak partisipante sira bele hatene no lidera ekipa editoriál sira ho konfiansa boot, fornese feedback konstrutivu, jere konversa sira ne’ebé difísil, hametin fluxu serbisu editoriál sira, klarifika papél no responsabilidade sira pesoál nian, no foti desizaun sira ne’ebé di’ak iha situasaun sira ne’ebé kompleksu.
Partisipante sira mai husi mídia oioin, inklui Rádiu Komunidade Maliana, Lian Oroluli News, Rádiu Komunidade Maubisse Mauloko, Dili Post Journal, GMN, Timor Post, RCC, Media Democracia, Neon Metin, RTTL, E.P., no Ajénsia TATOLI.
Fasilitadór formasaun mak eis-jornalista no Xefe Redasaun ABC News, Philippa McDonald no Matthew Carney, hamutuk ho Koordenadór Dezenvolvimentu Internasionál ABC iha Timor-Leste, Fernanda Maria.
Iha entrevista ho TATOLI Matthew Carney haktuir katak formasaun ne’e foka liu ba hasa’e kapasidade lideransa editoriál iha Timor-Leste.
“Lideransa hanesan abilidade krusiál ba kualkér organizasaun mídia, tanba ne’e ami kobre komponente xave lideransa nian ne’ebé bele ajuda harii kultura serbisu ne’ebé pozitivu”, Matthew Carney dehan.
Nia esplika katak matéria iha formasaun ne’e atu harii kultura serbisu ne’ebé pozitivu, fó feedback ba funsionáriu sira, hadi’a dezempeñu ekipa nian, jere orsamentu sira, no hadi’a sistema no fluxu serbisu editoriál sira.
“Ami mós sei iha diskusaun kona-ba oinsá atu navega konversa sira ne’ebé susar, tanba ida-ne’e dalabarak sai hanesan dezafiu ida ba líder sira. Ami-nia objetivu mak ajuda xefe-editór sira sai efetivu liu iha jestaun ekipa nian iha kada organizasaun husi mídia nian”, nia hateten.
Nai dehan atividade ida-ne’e sei la sai posivel sein apoiu husi Konsellu Imprensa. “Hamutuk ho ABC Dezenvolvimentu Internasionál, ami hakarak ajuda hametin kapasidade husi xefe redasaun sira iha Timor-Leste. Nune’e, meiu komunikasaun sosiál sira nasaun nian sei sai profisionál no sustentavel liután”, nia dehan.
Atividade ida-ne’e mós atu haburas sala redasaun sira ne’ebé kolaborativu liu, produtivu, no reziliente liu hodi hasoru dezafiu sira husi indústria mídia modernu nian.
Jornalista: Arminda Fonseca
Editora: Maria Auxiliadora
