DILI, 16 Juñu 2026 (TATOLI)—Nova Zelandia kontinua fó surpreza hafoin prodús golu rua (2) hasoru Iraun no termina jogu ho rezultadu empata 2-2, iha jogu Kopa Mundiál FIFA 2026 ne’ebé realiza iha Estádiu Los Angeles, Inglewood, tersa (16 Juñu 2026) ne’e.
Jogu ne’e lidera husi árbitru César Arturo Ramos husi nasaun Meksiko, no bainhira árbitru huu árbitu dahuluk ne’e lori jogadór sira lansa kedan kontra-atake va malu tuir rítmu jogu ida-idak nian.
Nova Zelándia lansa presaun maka’as hasoru nasaun mediu oriente ne’e ho velosidade jogu ne’ebé suli maka’as hanesan rusa-fuik be halai liu ho lais.
Husi atake hirak ne’e rezulta jogadór sira atu lees sala-sala rede Iraun nian iha kedan minutu dahuluk.
Nova Zelándia nasaun husi Pasífiku Sul, loke eskor sedu liu iha ninutu hitu (7), jogadór E. Just marka golu dahuluk ba Nova Zelandia iha Kopa Mundiál ho rezultadu 1-0.
Jogu la’o manas liután, maske Iraun sofre ona golu ida, maibé Iranianu sira la lakon esperansa hodi kontinua luta oinsá bele hetan vitória iha jogu ne’e.
Nune’e, Iraun nia esperansa la hela de’it hanesan esperansa maibé sira hatudu duni jogu ho rezisténsia. Jogadór Ramin Rezaeian hamriik hikas ho firme muda eskor 1-1 iha minutu 32, molok jogu primeira parte termina.
Hakat ba segunda parte, Nova Zelándia hetan fali vantajen iha minutu 54. Jogadór Chris Wood nia pasajen badak ba iha kaixa penalidade nian hasoru ho Just nia suta ba dala uluk, ne’ebé halo baliza iranianu nakdoko.
Ida-ne’e mak Just nia golu daruak iha jogu ne’e, hodi muda rezultadu 2-1 hodi fó vitória provizóriu ba Nova Zelándia.
Liutiha minutu 10, Iraun halo empata 2-2. Jogadór Rezaiean nia kruzamentu hasoru ho kabesa Mohammad Mohebbi nian, ne’ebé tama liu ba rede laran halo adeptus hakilar no haksoit.
Iraun iha oportunidade atu hatama golu iha minutu 80, maibé jogadór Taremi nia kabesa semo sees husi poste guarda rede liman-loos ne’e.
Jogu la’o to’o minutu 90+5 termina laiha tan golu akontese, nune’e nasaun rua tenke empata 2-2 iha jogu dahuluk faze grupu nian.
Ho rezultadu empata 2-2 ne’e, Nova Zelandia okupa pozisaun dahuluk grupu temporariamente ho pontu 1 no golu 2, no Iraun iha pozisaun daruak ho pontu no golu rua (2).
Iraun (4-4-2)
Beiravand; Rezaeian, Nemati, Khalizadeh, Mohamadi; Mohebbi, Ghoddos, Ezatolahi, Yousefi, Shariar, Taremi
Nova Zelándia (4-2-3-1)
Crocombe; Payne, Surman, Boxall, Cacace; Bell, Stamenic; McCowatt, Singh, Just, Wood.
Jornalista : Hortêncio Sanchez
Editór : Cancio Ximenes
