MALIANA, 16 Juñu 2026 (TATOLI) – Prezidente Autoridade Munisípiu Bobonaru, Paulo Moniz Maia, husu komunidade, liuliu joven sira atu akompaña Kopa Mundiál 2026 ho disiplina no responsabilidade, hodi evita hamosu distúrbiu durante kompetisaun futeból internasionál ne’e realiza..
Paulo Moniz Maia hateten katak Autoridade Munisípiu Bobonaru prepara ona programa atu fasilita komunidade asiste hamutuk Kopa Mundiál, liuhusi ekran públiku iha Jináziu Maliana, liuliu ba jogu sira ne’ebé realiza iha kalan.
Notísia relevante: Euforia Kopa Mundiál 2026 hahú sente iha Maliana
“Kopa Mundiál mak eventu ida ne’ebé ema iha mundu tomak, inklui Timor-Leste kontente atu asisti. Tanba ne’e, ami prepara fatin ida iha Jináziu Maliana atu komunidade bele mai akompaña jogu sira hamutuk. Akompaña joga hotu fila ho kontente, lalika halo barullu, labele halo buat oin-oin, labele hemu tua”, Paulo Moniz Maia dehan iha salaun Maria Tapó, tersa-feira ne’e.
Prezidente Autoridade ne’e mós husu ba adeptu sira atu labele organiza komboiu motorizadu iha sidade Maliana bainhira ekipa ne’ebé sira apoia manán, tanba bele perturba movimentu públiku no seguransa komunidade.
Nia esplika katak komunidade sira bele goza atmosfera Kopa Mundiál no halo atividade rekreativa, maibé tenke respeita ordem públika no fó hakmatek komunidade seluk.
“Importante mak bele asiste, bele taru halimar, más labele halo barullu, labele dehan ó manán hatún fali ida lakon ne’e. Ida lakon sai nervozu fali, lakon osan lakon jogu, tanba ema iha Amerika mak joga, ita iha ne’e taru halimar atu kontente akompaña ho jogu ne’e, ita taru halimar osan karik, prontu o nia lakon o simu lakon, ida ne’ebé manán o simu o nia manán”, nia fó hanoin.
Aleinde ne’e, nia alerta ba populasaun sira atu mantein limpeza iha fatin ne’ebé uza ba asiste jogu hodi garante ambiente moos no saudavel.
“Ha’u espera Kopa Mundiál remata ho ambiente ne’ebé seguru no hakmatek iha Bobonaru, no komunidade hotu bele disfruta eventu ida-ne’e ho responsabilidade”, nia salienta.
Iha kapitál Maliana adeptu sira hahú hasa’e no kesi bandeira nasaun favórita nia mak hanesan Alemaña, Brazíl, Fransa, España no nasaun seluk tan maibé barak liu bandeira Portugál ho Argentine.
Notísia Relevante: Governu husu joven sira akompaña Kopa Mundiál ho dame
Jornalista: Sergio da Cruz
Editora: Maria Auxiliadora
