OEKUSI, 16 Juñu 2026 (TATOLI) – Kooperativa Kréditu Mnatu Bítimo (KKMB) tinan ne’e kompleta nia ezisténsia ba dala-11 nu’udar organizasaun rai no empresta osan. Kooperativa ne’ebé hahú estabelese iha tinan-2014 liubá husi inisiativa Oekusi-oan na’in-11 iha kapitál Dili ne’e, foin lalais selebra ninia aniversáriu iha sede filiál Oekusi ho susesu no planu boot ba futuru.
Prezidente KKMB, Herculano de Sousa, garante katak tinan-11 ne’e nu’udar tempu ne’ebé naton ona ba organizasaun ne’e atu aprende no hamriik ho maduru.
“KKMB la’o ona tinan-11, hanesan ema karik, hahú luta nia futuru iha eskola primária, tempu naton ona atu aprende hodi hamriik maduru hanesan organizasaun kooperativa ida atu atende membru sira, husi tinan-10 kotuk, ohin ita-nia fundu kapitál atinje ona rihun $800-resin, ho membru 200-resin iha Dili no Oekusi,” Herculano de Sousa hateten.
Istória no dezafiu inisiál
Iha ninia diskursu, Prezidente ne’e konta fali trajetória kooperativa nian ne’ebé uluk hahú husi inisiátiva ema na’in-15 nian nu’udar fundadór. Motivasaun prinsipál moris husi hakarak atu responde ba prosesu dezenvolvimentu iha Oekusi, liuliu iha momentu ne’ebé Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Komersiál Merkadu (ZEESM) foin atu hahú.
Iha tempu ne’ebá, intelektuál Oekusi sira hamutuk beibeik kada semana no kada fulan hodi diskute asuntu dezenvolvimentu rai-laran.
“Ha’u hanoin tempu di’ak, ita tenke lasu ida hodi kesi-malu, maka tenke harii kooperativa, maske tuur hamutuk troka opiniaun ba malu, maibé presiza hametin liután unidade ne’e, ba futuru nia rezultadu di’ak ba ita hotu,” nia hateten.
Notísia relevante:Tinan ne’e, Kooperativa Kréditu Mnatu Bítimo nia osan-funan sa’e signifikativu
Prosesu ne’e la’o la’ós fasil tanba mosu mós pro no kontra. Iha sorumutu balun, tuir Herculano, ema balun rejeita ona atu partisipa no balun apoia, to’o ikus hela de’it ema na’in-15 mak kontinua eziste hodi dudu inisiativa ne’e to’o ohin loron.
“Ida-ne’e efetivu duni, tanba kada fulan ami mai tau ami-nia osan no aproveita tempu hodi diskuti kona-ba prosesu dezenvolvimentu rai laran, inisiativa ne’e maka dudu ami atu estabelese, klaru katak, iha inísiu hanesan organizasaun sempre iha dezafiu, tanba ne’e buat foun ba ami iha tempu ne’ebá. Ami la’o ho aprende, no kada tinan tuur hamutuk halo avaliasaun atu hadi’a hodi avansa ba oin,” nia informa.
Difikuldade boot seluk iha inísiu mak fatin edifísiu nian. Tanba seidauk iha sede, membru sira halo de’it rotasaun hodi halibur osan husi uma ba uma. Maibé, ho kapitál ne’ebé sufisiénte ona, KKMB konsege konstrui ona nia sede sentrál iha Dili no filiál iha Oekusi.
“Entaun uluk ami la’o de’it no konsentra iha Dili de’it maibé tinan lima kotuk ami komesa loke ona nia filiál iha Oekusi, no agora membru aumenta tantu husi Dili no Oekusi,” nia haktuir.
Impaktu no mehi ba futuru
Husi inisiativa simples ne’e, KKMB fó impaktu boot tebes ba ninia membru sira, la’ós de’it mós fatin atu tuur hamutuk, maibé nakfilak ba meiu dezenvolvimentu ekonómiku ba membru sira-nia moris. Ho baze kapitál no membru ne’ebé metin, kooperativa ne’e iha mehi boot atu sa’e nível.
“Ida-ne’e maka susesu ne’ebé ami sente. Tanba ne’e, ha’u-nia esparansa oin, ami-nia mehi ne’e katak to’o tempu ida ami tenke sai instituisaun Mikro Finansa ida iha Timor-Leste, ne’e ami-nia trajetu tanba rekezitu balun, ita-bele priénse ona, hanesan kapitál finanseiru no membru KKMB bele priénse,” Prezidente KKMB ne’e deklara.
Rekomendasaun husi membru
Iha biban hanesan, Crisviano Bobelo, nu’udar membru ativu iha kooperativa KKMB, hato’o ninia parabéns no solisita ba diresaun atu alarga liután sira-nia liras atividade nian hodi hametin baze finanseira kooperativa nian liuhusi diversifikasaun ekonómika.
“Ita ko’alia kona-ba sirkulár ekonomia, tenke hahú husi buat sira-ne’e, tenke halibur malu, tanba nia objetivu ne’e di’ak bai ta idak-idak, tanba Governu mós ko’alia kona-ba asuntu kooperativa, ne’ebé ho aniversáriu tinan-11, nu’udar membru ha’u-nia esperansa ba futuru la’ós de’it haree ba rai no empresta maibé loke loke tan atividade seluk hanesan ortikultura no matadouru nune’e bele aumenta fundu kapitál iha kooperativa nian,” Crisviano hato’o.
Jornalista: Abílio Elo Nini
Editór: Rafael Ximenes de A. Belo
