OEKUSI, 15 Juñu 2026 (TATOLI) – Kooperativa Kréditu Mnatu Bítimo (KKMB), Sábadu kalan ne’e, realiza seremónia enseramentu taka livru tinan fiskál 2024-2025 no abertura tinan fiskál 2026-2027, ba atividade rai no empresta osan durante fulan 12 nia laran, tantu iha Dili no Rejiaun Administrativa Espesiál Oekusi Ambeno (RAEOA) hatudu progresu di’ak tanba investimentu kapitál aumentu ho osan-funan ka juros inklui aumentu membru.
Prezidente Kooperativa Kréditu Mnatu Bitimo (KKMB), Herculano de Sousa, informa, atividade rai no empresta osan durante tinan ida, husi 2025 to’o 2026 ne’e, hatudu progresu di’ak, tanba iha aumentu ba kapitál no membru sira mós kontinua aumenta.
“Kada tinan ita sempre halo, bainhira kompleta tinan ida ka fulan 12 nia laran, entaun ita taka livru, depois kalkula osan-funan, durante ita hetan, liuhusi halibur membru sira-nia investimentu, depois to’o ikus ita fahe osan funan ka Sisa Hasil Usaha (SHU) ba membru ida-idak. Tanba ne’e, iha tinan ne’e ita konsege hetan nafatin progresu di’ak osan funan rihun $95,416, entermus númeru membru aumenta tantu Dili no Oekusi, no kapitál mós aumenta”, nia informa iha iha seremónia taka livru realiza iha sede KKMB Filiál Oekusi, sesta kalan ne’e.
Fundadór KKMB ne’e fundamenta, rezultadu ne’e kompara ho tinan-2024 ho 2025, kapitál iha de’it rihun $700, maibé tinan ne’e, sa’e ba rihun $800-resin.
“Ida-ne’e hatudu progresu di’ak tebes, no hatudu mós katak konfiansa husi membru sira-nian, kontinua aumenta hodi bele rai sira-nia osan, investe ba iha Kooperativa KKMB ne’e,” nia afirma.
Nia informa, bazeia rezultadu pezkisa husi inisiádor Kooperativa KKMB katak, membru sira, ida-idak sente ona, benefisíu husi prosesu investimentu KKMB, tanba iha mudansa ona iha sira-nia moris, kompara ho antes ladauk integra-an iha kooperativa no depois.
Prezidente KKMB ne’e haktuir, durante ne’e enfrenta mós dezafiu barak, iha Administrativa no operasionál, maibé la’ós bareira boot ba membru sira no kooperativa, maibe nu’udar dalan ida, oinsá mellora atendimentu di’ak no profisionál ba membru sira hotu.
Tuir nia, difikuldade sira maka to’o tempu taka livru, balun devolve fali sira-nia emprestimu, maibé ida-ne’e fó hanoin ba ita ida-idak, katak ba oin tenke halo reflesaun, haree no aprende katak bainhira empresta tenke empresta ho responsabilidade, tanba osan ne’e membru hothotu nian,” nia hateten.
“Tanba ne’e, komesa tinan fiskál foun ne’e, 2-26-2027, KKMB sei rekruta ema ida nu’udar koletór atu sisi kréditu sira iha membru sira, meiu ida-ne’e, atu asegura katak membru hothotu iha responsabilidade, entaun ba oin, iha esperansa katak membru sei aumenta, kapitál mós sei aumenta”, nia informa.
Criviano Bobelo, nu’udar membru KKMB, sente orgullu ho esperansa ida katak ba futuru, bele di’ak liutan no aumenta tan membru foun, tanba dadaun ne’e KKMB filiál akumula ona membru hamutuk 171.
“Ha’u nia haree kooperativa ne’e buat hotu la’o ho di’ak, tanba serbisu la’o ho transparénsia, ne’ebe ema hotu tau ona konfiansa ba kooperativa atu rai sira-nia osan, espera ba futuru bele sai di’ak liutan, tanba ita tama kooperativa fó benefisiu ba ita, la’ós ba pesoál de’it, hanesan ha’u mesak maka tama iha Kooperativa KKMB ne’e, maibé nia benefisiu ne’e ba ha’u nia família tomak hodi asesu hotu, tanba kada fulan ita rai itoan, to’o tempu ita la senti, osan ne’e bo’ot,” nia hateten.
Jornalista: Abílio Elo Nini
Editór: Rafael Ximenes de A. Belo
