OEKUSI, 16 Juñu 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), segunda ne’e halao enkontru estabelesimentu komisaun organizadora hodi prepara kona-ba implementasaun Programa Tatoli Hakbesik ne’ebé sei realiza iha loron 26 Juñu 2026 iha Oekusi ho oradór prinsipál maka Prezidente Repúblika hodi ko’alia kona-ba Fraternidade Umana.
Notísia relevante:TATOLI,I.P koordena ho autoridade RAEOA hodi realiza Programa “Tatoli Hakbesik” iha Oekusi
Sekretáriu Rejionál ba Asuntu Administrasaun no Finansa, Salvador da Cruz, informa, iha enkontru estabelesimentu komisaun ne’e, Autoridade RAEOA deside ona kona-ba bainaka espesiál sira husi nasaun viziña Propínsia NTT, sei konvida ema na’in-90 atu partisipa Programa Tatoli Hakbesik.
“Ohin ami hahú enkontru preparasaun ba programa Tatoli Hakbesik, ne’ebé sei realiza iha semana oin, ne’e maka ohin ita konvida hotu jestór sub-rejiaun haat no kargu xefia sira, atu estabelese komisaun, no diskuti mós kona-ba bainaka husi nasaun viziñu atu partisipa ema na’in-90 hanesan ne’e,” nia nforma hafoin remata enkontru iha salaun Gabinete Oekusi, segunda ne’e.
Autoridade ne’e esplika, bainaka na’in-90 ne’e husi Kabupaten Belu, Timur Tengah Utara (TTU) no Kupang inklui autoridade husi propinsia nian.
“Ohin ami deside ona katak, kada administrasaun ida husi NTT sei konvida ema na’in-25 husi autoridade na’in-15 ho komunidade 15, hanesan Kefamenanu, Atambua no Kupang, no mós ei konvida autoridade propinsia nian mós sei konvida na’in-15,” nia hateten.
Kona-ba bainaka iha rai laran, nia informa, sei konvida, relijioza sira, juventude iha suku 20 ho Konsellu-Suku, sosiedade sívil no entidade relevante sira seluktan.
Notísia relevante:Tatoli Hakbesik iha RAEOA sei destaka implementasaun Fraternidade Umana
Programa Tatoli Hakbesik ba iha munisípiu, nu’udar programa prioridade husi mídia estatál TATOLI,I.P, neʼebé antes ne’e realiza ona iha Postu Administrativu Maubise, Munisípiu Ainro iha tinan-2025 ho oradór prinsipál maka Prezidente Repúblika, José Ramos Horta.
Entretantu, implementasaun Programa Tatoli Hakbesik iha RAEOA ne’e nia objetivu mak hametin konfiansa entre povu no Estadu, promove pás, diplomásia no defende direitu ema hotu. No, Rezultadu esperadu husi programa referidu iha RAEOA ne’e mak hametin relasaun Estadu ho povu, fó espasu atu kria konfiansa, solidariedade, no fraternidade umana, inklui valoriza diversidade kulturál no sosiál RAEΟΑ. Programa ne’e fó espasu atu fó apresiasaun ba kultura no identidade komunidade hanesan parte esensiál ba unidade nasionál.
Jornalista: Abílio Elo Nini
Editór: Rafael Ximenes de A. Belo
