DILI, 17 Juñu 2026 (TATOLI)—Ministériu Saúde (MS) hamutuk ho parseiru MENZIES, Kuarta ne’e, fasilita formasaun kona-ba moras nutrisaun, tuberkuloze, pulmaun saudavel no ezersísiu, hodi habelar edukasaun saúde ba estudante no komunidade ba profisionál saúde sira iha sentru saúde lima (5) iha Munisípiu Dili.
Objetivu no importánsia hosi formasaun ne’e atu hasa’e koñesimentu no kapasidade profisionál saúde sira-nian hodi bele hatutan fali ba estudante no komunidade einjerál. Formasaun ne’e hahú ohin (17/06) no sei ramata iha Sesta (19/06) semana ne’e.
Tuir Diretór Nasionál ba Formasaun, Institutu Nasionál Saúde Públika, Amelito Gomes, hateten sentru saúde lima ne’ebé partisipa mak Sentru Saúde Vera-Cruz, Sentru Saúde Komoro, Sentru Saúde Bekora, Sentru Saúde Metinaru no Sentru Saúde Formosa
“Ha’u-nia esperansa hosi formasaun ne’e, espera katak depoizde formasaun ne’e profisionál saúde sira bele fahe filafali ba komunidade kona-ba edukasaun no promosaun saúde ligadu ba prevensaun ba komunidade no estudante sira iha eskola sira,” Amelito Gomes dehan ba jornalista sira iha MENZIES, Bidau Lecidere.
Nia dehan hafoin formasaun ramata ekipa sei ba deskansa liu fulan ida, hafoin hahú implementasaun no planu sei futuru sei habelar ba munisípiu sira seluk.
Iha fatin hanesan, Xefe Departamentu Programa Sentru Munisipál Dili, Hélio Duarte, hatutan Timor-Leste enfrenta nafatin kazu tuberkuloze no mánutrisaun ne’ebé aas.
“Tanba ne’e, programa ida-ne’e inisia parseiru sira-nia hanoin atu halo formasaun, oinsá ita-nia komunidade bele komprende didi’ak kona-ba moras sira-ne’e no bele prevene ho di’ak iha futuru,” Hélio Duarte dehan.
Partisipante ka pontu vogál formasaun ne’e maihusi ekipa Diresaun Nasional Edukasaun no Promosaun Saúde, Diresaun Nasionál Edukasaun Inkluziva no Asaun Sosiál Eskolár iha Ministériu Edukasaun no Ministériu Saúde iha Servisu Munisipál Saúde Dili, iha Sentru Saúde lima iha Dili no Menzies Timor-Leste.
Jornalista: Osória Marques
Editór: Xisto Freitas da Piedade
