DILI, 27 Juñu 2026 (TATOLI)– Primeiru-Ministru, Kayrala Xanana Gusmão, rekomenda ba universidade sira iha Portugál atu aumenta loke tan vaga kursu direitu ba timoroan sira,
Apelu ne’e hato’o hosi Xefe Governu bainhira hala’o enkontru kortezia ho reitór no diretór sira husi universidade oioin iha Portugál, inklui Universidade Católica, Universidade Nova de Lisboa, Fakuldade Direitu hosi Universidade do Porto, Coimbra no Minho (Braga), hamutuk mós ho Prezidente Institutu Medisina Legál nian.
Iha enkontru ne’e, Primeiru-Ministru hato’o agradesimentu boot ba apoiu kontinua ne’ebé Portugál fó durante prosesu konstrusaun Estadu Timor-Leste nian, no destaka katak relasaun bilaterál entre nasaun rua ne’e kontinua forte liuhusi relasaun istórika, kultura, no lian komún (Portugués).
“Maski Timor-Leste hetan ona independénsia durante tinan-24, nasaun sei enfronta dezafiu iha área edukasaun, saúde, no justisa, ne’ebé importante tebes ba dezenvolvimentu nasionál,” PM Xanana relata durante enkontru iha Portugál.
Xefe Governu esplika katak, daudaun ne’e, Governu Timor-Leste implementa hela reforma komprensiva iha seitór judisiáriu, no formasaun ba kuadru jurídiku sira sai hanesan pasu importante ida atu garante susesu ba reforma ne’e. Maski nune’e, obstákulu boot ida iha formasaun jurídika mak domíniu ba lian Portugés.
Hodi responde ba dezafiu ne’e, Xanana dehan Governu aprova ona programa espesiál ida atu forma estudante hamutuk-na’in 50 kada tinan iha Fakuldade Direitu sira iha nasaun lian Portugés nian, ho finansiamentu hosi Fundu Dezenvolvimentu Kapitál Umanu (FDCH).
“Protokolu kooperasaun ne’ebé asina ona ho universidade sira iha Portugál permite estudante timoroan sira atu frekuenta kursu lisensiatura iha área direitu. Maibé, númeru vaga disponível seidauk sufisiente atu atinji objetivu Governu nian atu forma jurista barak liu bá futuru”, Xefe Governu haktuir.
Tanba ne’e, nia husu bá universidade sira iha Portugál atu konsidera hodi aumenta númeru vaga bá estudante timoroan sira, nune’e bele aumenta kualidade no kuantidade lisensiadu sira iha área Direitu.
Iha fatin hanesan, Xefe Governu mós apela ba instituisaun akadémika sira-ne’e atu kria kolaborasaun metin ho Fakuldade Direitu, Universidade Nasionál Timor Lorosa’e (UNTL), hodi estabelese mekanizmu preparasaun (kursu preparatóriu) ne’ebé apropriadu ba estudante sira antes haruka ba Portugál, liuliu ba koñesimentu jurídiku no domíniu lian Portugés.
“Investimentu iha formasaun jurista sira sei kontribui diretamente bá fortalesimentu sistema justisa no dezenvolvimentu institusionál Timor-Leste nian iha futuru”, nia konklui.
Notísia relevante:Xanana apela ba bolseiru timoroan iha Portugál estuda ho seriedade – responsabilidade
Jornalista: Alexandra da Costa
Editór: Rafael Ximenes de A. Belo
