DÍLI, 29 Juñu 2026 (TATOLI) – Asosiasaun Futsal Timor-Leste (AFTL) ofisialmente estabelese parseria estratéjika ho TELEMOR liuhosi assinatura Akordu Direitu Transmisaun (Broadcasting Rights Agreement) hodi transmite Liga Futsal Timor-Leste no Kopa AFTL durante tinan lima.
Sekretáriu-Jerál AFTL, Mario Guterres, hateten katak kooperasaun ho TELEMOR ne’e nu’udar kontinuidade hosi kolaborasaun ne’ebé hahú ona iha tinan hirak liubá. Liuhosi parseria ida-ne’e, jogu Liga Futsal Timor-Leste bele asesu hosi ema barak, inklui sidadaun sira iha munisípiu no sira ne’ebé hela iha rai-li’ur.
“Plataforma ne’ebé TELEMOR fornese importante tebes ba dezenvolvimentu futsal nasionál. Kooperasaun ida-ne’e loke dalan ba futsal atu kontinua buras no fó asesu ba ema barak liu tan,” Mario hateten ba jornalista sira iha Timor Plaza.
Nia esplika katak, la hanesan tinan kotuk ne’ebé transmisaun asesível de’it ba kliente TELEMOR sira, iha tinan ida-ne’e transmisaun direta sei loke ba públiku tomak, nu’udar resposta ba pedidu públiku ne’ebé hakarak atu akompaña kompetisaun futsal nasionál.
Mario hatutan katak kooperasaun ida-ne’e fó benefísiu finanseiru ba dezenvolvimentu kompetisaun. AFTL sei simu 35% hosi rendimentu live streaming atu apoia Liga Futsal no fó subsídiu ba klubu sira ne’ebé partisipa.
“Nune’e bele ajuda kobre kustu operasionál liga no hasa’e rekursu finanseiru klubu sira nian, tanba kompetisaun ne’ebé hala’o durante fulan tolu to’o haat presiza orsamentu boot,” nia dehan.
Mario akresenta katak rejistu ba partisipante taka ona, ho klubu 14 mak sei kompete iha Primeira Divizaun, ne’ebé tuir planu sei hahú iha fulan Jullu.
Entretantu, Diretór-Jerál TELEMOR, Vu Duc Nguyen, hateten katak parseria ida-ne’e hatudu kompromisu hamutuk hosi instituisaun rua atu apoia dezenvolvimentu futsal iha Timor-Leste.
Nia dehan katak TELEMOR la’ós de’it fornese servisu telekomunikasaun, maibé hakarak mós sai parseria ba dezenvolvimentu desportu liuhosi utilizasaun plataforma dijitál no servisu transmisaun.
“Desportu, liuliu futsal, iha forsa atu inspira jerasaun foun, no kuda espírittu kooperasaun, disiplina no orgullu nasionál. Ami hakarak lori futsal besik liu ba públiku no fó oportunidade boot liu ba jerasaun foun atu dezenvolve-an liuhosi desportu,” nia dehan.
Nia salienta katak kooperasaun ida-ne’e bazeia ba vizaun hamutuk atu hasa’e padraun futsal iha Timor-Leste no fó esperiénsia di’ak liu ba adeptu sira iha nasaun tomak.
Iha fatin hanesan, Jestor Servisu Dijitál TELEMOR, Nguyen Duc Minh, dehan katak desizaun kompañia atu apoia futsal mai hosi antuziazmu públiku Timor-Leste nian ne’ebé aas tebes ba desportu ida-ne’e.
“Liuhosi plataforma Timor TV, TELEMOR hakarak transmite jogu ho kualidade ba públiku, liuliu ba sira ne’ebé hela iha área remota no sidadaun Timor-Leste sira iha rai-li’ur ne’ebé durante ne’e susar atu tuir kompetisaun diretamente,” nia hatutan.
“Ami-nia objetivu mak atu hasa’e visibilidade futsal Timor-Leste nian no ajuda desportu ida-ne’e atu kontinua dezenvolve iha futuru,” nia dehan.
Aleinde fornese transmisaun direta, TELEMOR sei apoia mós organizasaun atividade promosaun oioin, servisu hamutuk ho média, no fó apoiu finanseiru, rekursu umanu, koñesimentu tékniku no plataforma dijitál hodi asegura katak akordu ida-ne’e fó benefísiu ba dezenvolvimentu futsal nasionál.
Jornalista: Alexandra da Costa
Editór: Filomeno Martins
