DILI, 30 Juñu 2026 (TATOLI)-Prezidente Komisaun F iha Parlamentu Nasionál ne’ebé trata Asuntu Saúde, Igualdade Jéneru no Inkluzaun Sosiál, Maria Gorumali Barreto, alerta ba entidade relevante sira atu toma medida séria hodi prevene kazu tara-an ne’ebé iha territóriu.
Nia dehan númeru kazu suisídiu ou tara-an ne’ebé iha Timor-Leste kontinua aumenta no maioria feto mak komete, no horisehik akontese tan iha munisípiu Likísa.
Deputada ne’e dehan kazu ne’e grave no, tuir dadus husi Polísia Nasionál Timor-Leste (PNTL), iha Outubru 2025 to’o Janeiru 2026 rejista kazu hamutuk 13.
“Ita la hatene akontese husi Fevereiru to’o Maiu ne’e hira? Más horisehik aumenta tan kazu ida ne’e ba 14. Kazu hanesan ne’e hamosu preokupasaun boot husi komunidade, tanba lakon ema nia vida”, nia levanta iha reuniaun plenária Paralementu, ohin.
Tuir deputadu, haree husi tendénsia kazu ne’e kontinua akontese mak presiza hatene motivu loos, tanba mosu depresaun no psikolojia, problema sosiál, ekonomia, dezentendimentu iha uma laran ou motivu husi ema seluk mak hakotu ema nia vida liuhusi tara-an.
Deputadu husi bankada Kongresu Nasionál Rekonstrusaun Timorense (CNRT, sigla portugés) ne’e bolu atensaun ba PNTL atu iha prosesu investigasaun kriminál presiza rekolla evidénsia ho detallu no haree fatór hotu antes prosesa ba autoridade judisiál atu vítima hetan justisa.
Ba Ministériu Solidariedade Sosiál no Inkluzaun (MSSI) haree ba asuntu sosiál liuhusi ofisiál sira ne’ebé destaka iha postu administrativu hotu halo serbisu ho sériu no vizita tama-sai uma hodi haree diretamente kondisaun moris populasaun nian iha situasaun difísil atu Estadu tau matan.
Sekretária Estadu Igualdade (SEI) kontinua divulga informasaun ba komunidade kona-ba lei sira ne’ebé relevante ho feto.
“Presiza iha serbisu integradu husi liña ministériu sira, nune’e bele prevene kazu suisídu ne’ebé akontese iha ita-nia rai-laran”, katak.
Vise-Ministru ba Asuntu Parlamentár, Adérito Hugo da Costa, hateten dadus estatístika ne’e importante no sei envia ba entidade tutela, liuliu Ministériu Interiór, PNTL no parte komponente hothotu atu haree pontu situasaun ida-ne’e.
Jornalista: Nelson de Sousa
Editora: Maria Auxiliadora
