DILI, 30 Juñu 2026 (TATOLI) – Diretór Ensinu Báziku Sentrál (EBC) 10 Dezembru, Calistro A. Guterres, husu Governu, liuhusi Ministériu Edukasaun (ME), atu koloka seguransa permanente ida ka rua iha eskola referida hodi proteje fasilidade no material eskola nian.
Calistro hateten katak iha kalan, ema deskoñesidu sira dala barak tama ilegalmente ba área eskola, no komete aktu sira hanesan hakerek ba parede, estraga vidru, no naok kadeira, meja no ekipamentu seluk.
“Husu ba Governu, liuhusi Ministériu Edukasaun, atu koloka pesoál seguransa iha eskola ne’e atu bele kontrola área eskola. Iha tempu kalan, ema tama tuir sira nia hakarak, hakerek ba parede, estraga vidru eskola nian, no naok kadeira, meja no sasan seluk,” dehan Calistro ba TATOLI iha Comoro, Tersa ne’e.
Nia esplika katak EBC 10 Dezembru lokaliza iha área ida ne’ebé luan, fahe fatin ho Ensinu Sekundáriu, no besik mós ba Merkadu Comoro. Kondisaun ida-ne’e, tuir nia, halo kontrolu sai difísil bainhira laiha pesoál seguransa permanente.
“Antes ne’e ami iha mestre ida ne’ebé hela iha área eskola no ajuda halo kontrolu iha tempu kalan. Maibé nia muda ona ba Hera tanba nia uma hetan eviksaun husi Ministériu Edukasaun iha tinan 2024. Desde tempu ne’e to’o agora, eskola laiha ona seguransa, no ida-ne’e fó biban ba ema atu tama no estraga sasan eskola,” nia hateten.
Tuir Calistro, durante loron atividade eskola lao normalmente tanba profesór sira iha fatin. Maibé iha kalan, tanba laiha seguransa, ema balu haksuit liuhusi muru proteksaun no tama ba área eskola hodi halo estragus no naok sasan.
“Tanba sasan eskola lakon bebeik, ami husu ba Ministériu Edukasaun atu rekruta no koloka seguransa ida ka rua iha EBC 10 Dezembru atu halo vigilánsia durante loron tomak,” nia konklui.
Dadaun ne’e, EBC 10 Dezembru iha profesór permanente hamutuk ema 48 no estudante liu 800.
Jornalista: Camilio de Sousa
Editór: Filomeno Martins
