DILI, 06 Jullu 2026 (TATOLI)—Ministériu Saúde liuhusi Diresaun Nasionál Aprovizionamentu Ekipamentu Médiku hahú sosa ona ekipamentu médiku no naun médiku iha Xina hodi prienxe ba edifísiu pediatria andar lima iha Hospitál Nasionál Guido Valadares ne’e sei to’o iha fulan-setembru no outubru 2026.
Diretora Nasionál Ekipamentu Médiku iha Ministériu Saúde Luduvina C.E da Costa, hateten prosesu no akizisaun sira loos ona no agora hein de’it ona empreza sira sosa atu hatama mai.
“Empreza manán na’in iha ona, no agora tama ba prosesu kompras ona, ekipamentu sira-ne’e hotu emprreza ba kompra iha nasaun Xina, empreza ne’e mós internasionál,” Diretora Nasionál Ekipamentu Médiku iha Ministériu Saúde, Luduvina C.E da Costa, hateten ba jornalista sira iha nia kna’ar fatin, Lahane, ohin.
Nia dehan, tuir meta loloos ne’e iha fulan-Juñu maibé seidauk tanba prosesu sira-ne’e hotu foin mak la’o no hala’o.
“Tanba sira husu loron 140, ne’ebé ita bele dehan Setembru se lae Outubru mak ekipamentu médiku no naun médiku sira to’o mai iha ita-nia raine’e halo kedas instala ona ba Pediatria nia laran,” nia dehan.
Kona-ba ekipamentu sira-ne’ebé mak daudaun ne’e emperza prosesu ekipamentu sira hotu kedas, kuaze kona-ba ekipamentu sira-ne’ebé mak atu prienxe iha edifísiu pediatria andar lima ne’e kompletu.
“Ekipamentu médiku no ekipamentu na’in médiku, kona ba garantia katak to’o fulan-Setembru no Outubru maibé ida-ne’e depende. Seib klaru liu CNA mak hatete liu, tanba projetu hotu-hotu liuhusi CNA, ne’ebé ida-ne’e CNA mak bele responde ida-ne’e nomós ba empreza naran saida ne’e mós CNA mak hatene liu,” nia esplika.
Orsamentu ne’ebé mak gasta atu sosa ekipamentu médiku no naun médiku sira atu prienxe ba edifísiu pediatria andar lima ne’e hamutuk miliaun $3-resin.
Antes ne’e, Diretór Jerál Servisu Koorperativu iha Ministériu Saúde, Narciso Fernandes, informa kona-ba edifísiu andar lima ne’ebé ema daudaun ne’e halo iha Hospitál Nasionál Guido Valadares, iha fulan-Juñu atu halo ona instalasaun ba ekipamentu médiku no naun médiku.
“Edifísiu pediatria andar lima iha Hospitál Nasionál Guido Valadares, ita depende ba ekipamentu. Ita-nia planu ne’e iha fulan-Juñu ne’e instalasaun ba ekipamentu ne’e kompletu ona,” Diretór Jerál Koorperativu iha Ministériu Saúde, Narciso Fernandes, hateten ba jornalista sira iha Palásiu Governu, hafoin termina reuniaun Konsellu Ministru.
Nia dehan, agora Ministériu Saúde hein hela ekipamentu médiku, bainhira kompletu ona no mós prienxe ona entaun oinsá haree fali ba prepara rekursu umanu.
“La,ós ba edifísiu pediatria andar lima ne’e de’it, ekipamentu tau tiha maibé rekursu ladún. Entaun, MS prepara mós rekursu umanu, farda sira ba ema, regulamentu sira ba servisu. Treina ema oinsá atu presta servisu nomós oinsá atu uza ekipamentu iha ne’ebá,” nia dehan.
Tanba ne’e, nia dehan, agora Ministériu Saúde prepara hela to’o bainhira instalasaun sira-ne’e hotu.
“Ita haree edifísiu pediatria prontu ona, ema mós prontu ona para halo servisu atendimentu ba populasaun, ne’ebé iha etapa hirak kedas mak agora prepara hela ba oin,” nia dehan.
Jornalista : Felicidade Ximenes
Editór : Cancio Ximenes
