VIKEKE, 07 Jullu 2026 (TATOLI)—Xefe Suku Ossú de Cima, Postu Administrativu Ossú, Munisípiu Vikeke, Celestino M. de Carvalho, hateten Suku Ossú de Cima laiha estensionista durante tinan neen (6) ona, tan ne’e presiza koloka estensionista iha suku.
“Uluk ne’e ami iha estensionista maibé estensionista ne’e hakotu-iis ona, entaun to’o agora seidauk iha substituisaun. Tan ne’e, ha’u husu MInistériu Agrikultura, Peska, Pekuária no Floresta (MAPPF) koloka estensionista iha ami-nia suku hodi haree ba asuntu agrikultura,” Celestino ba TATOLI iha Postu Vikeke Vila, Tersa ne’e.
Autoridade komunitária ne’e esplika katak atu hasa’e produsaun agríkola tenke koloka estensionista hodi fó asisténsia téknika ba agrikultór sira hodi halo produsaun hanesan natar, ortikultura, peska no pekuária sira.
“Se estensionista laiha nafatin, agrikultór sira naran kuda hare la tuir sistema agrikultura. Tan ne’e mak ami sujere presiza koloka iha suku hodi halo monitorizasaun ba atividade agrikultura sira ne’ebé implementa iha ami-nia suku, para agrikultór sira enfrenta problema ruma, estensionista bele fó formasaun ba ita-nia agrikultór sira,” nia rekomenda.
Hatán ba preokupasaun ne’e, Diretór Servisu Ministériu Agrikultura, Peska, Pekuária no Floresta (SMAPPF), Olívio Soares Freitas, hateten SMAPPF Munisípiu Vikeke durante ne’e iha limitasaun rekursu estensionista, tanba ne’e mak la koloka ba Suku Ossú de Cima.
“Estensionista mak sai problema ba ita tanba ita-nia estensionista ne’ebé daudaun ne’e iha hamutuk na’in-23. Ita suku 38 maibé suku balun laiha estensionista. Nune’e, iha tinan ida-ne’e ita tau ona ba planu prioridade hodi rekruta estensionista hamutuk na’in-15 inklui koordenadór estensionista ba kada postu sira. Orsamentu ba rekrutamentu hamutuk rihun $26 ne’ebé ita aprezenta ona ba munisípiu Vikeke. Ami espera katak orsamentu ne’ebé ita propoin ba rekrutamentu hetan aprovasaun. Se ita-nia orsamentu aprova ona entaun iha tinan 2027 ita bele halo rekrutamentu ba estensionista hodi koloka ba suku sira,” nia tenik.
Jornalista: Vitorino Lopes da Costa
Editór: Xisto Freitas da Piedade
