DILI, 10 Jullu 2026 (TATOLI) – Prezidente Dalimak Repúblika Indonézia, Megawati Soekarnoputri, vizita Semitériu Eroi SEROJA, iha Dili, hodi fó omenajen ba eroi Indonézia no Timor-Leste ne’ebé sakrifika sira-nia vida ba luta nasaun rua ne’e nian.
Pur volta tuku 10h00 dadeer, bainaka sira hanesan padre no madre, sidadaun indonéziu sira, ezekutivu sira husi Empreza Estatál Indonézia (BUMN) no empreza privada sira ne’ebé hala’o operasaun iha Timor-Leste, nomós funsionáriu sira husi Embaixada Repúblika Indonézia (KBRI) iha Díli, marka ona prezensa iha fatin dezde dadeer, inklui mós reprezentante sira husi Palásiu Prezidensiál Timor-Leste.
Megawati ho nia komitiva to’o iha Semitériu Eroi Seroja pur volta tuku 11h00 dadeer. Bainhira to’o, nia asina livru bainaka nian molok partisipa iha serimónia hodi fó omenajen ba eroi sira.
Serimónia hahú ho saudasaun jerál no momentu silénsiu ida ne’ebé lidera pesoalmente husi Megawati. Hafoin nia tau ai-funan ida iha Monumentu Garuda Bhinneka Tunggal Ika nu’udar marka respeitu ba funu-na’in sira ne’ebé mate.
Prosesu kontinua ho kari ai-funan iha eis-Governadór Timor Leste, Arnaldo dos Reis Araújo, nia rate. Hafoin Megawati foto hamutuk ho nia família, delegasaun Indonézia, funsionáriu sira embaixada nian, no bainaka sira ne’ebé marka prezensa.
Adidu Defeza iha Embaixada Repúblika Indonézia iha Timor-Leste, Koronél (Artilleria) Hengky Sweeto Parsaoran, afirma katak vizita bá fatin memoriál ne’e sai hanesan omenajen ba eroi nasaun rua nian ne’ebé sakrifika sira-nia vida ba luta no glória idaidak nia nasaun.
Nia esplika katak iha tempu hanesan, Sekretáriu-Jerál PDI-P, ne’ebé reprezenta Megawati, hala’o mós vizita bá Jadín Eroi Metinaru tanba kondisaun saúde Megawati nian la permite atu halo vizita iha fatin rua.
Pur volta tuku 11h30, Megawati ho nia komitiva sai husi Semitériu SEROJA bá Otél Palm Springs hodi deskansa molok tuir almosu hamutuk ho Primeiru-Ministru, Xanana Gusmão.
Megawati tuir ajenda, aranka bá Aeroportu Internasionál Prezidente Nicolau Lobato iha tuku 15h35. Komitiva ne’e to’o iha aeroportu maizumenus tuku 15h40 hodi kompleta prosedimentu partida molok semo bá Indonézia ho aviaun privadu (PK-KAS) iha tuku 16h00 PM (oras Timor-Leste).
Notísia relevante: Megawati propoin parseria entre partidu polítiku atu hametin demokrasia
Jornalista: Arminda Fonseca
Editora: Maria Auxiliadora
