DILI, 10 Jullu 2026 (TATOLI)-Ministériu Negósiu Estranjeiru no Kooperasaun (MNEK), Komisaun Funsaun Públika (KFP), no Governu Austrália, lansa edisaun daruak Programa Formasaun Lia-Inglés ba Adezaun ASEAN (ELTAA, sigla inglés), atu kontinua hametin kapasidade língua ingleza ba funsionáriu públiku sira hodi apoia partisipasaun Timor-Leste iha prosesu ASEAN no kooperasaun rejionál.
Diretor-Jerál MNEK ba Asuntu ASEAN, Jorge Camões, dehan país adere ona ba organizasaun ne’e nu’udar membru plenu iha tinan kotuk, tanba ne’e inglés nu’udar língua ofisiál ASEAN nian.
Nune’e, iha nesesidade ba kuadru no funsionáriu sira bele ko’alia hodi halo interasaun di’ak iha serbisu ASEAN ninian.
Formasaun ne’e hala’o durante fulan neen no iha programa daruak ne’e partisipa husi funsionáriu na’in-15, husi instituisaun 27 ne’ebé serbisu iha pilár ASEAN Political-Security Community (APSC) no ASEAN Socio-Cultural Community (ASCC).
Iha programa dahuluk realiza iha tinan kotuk fó ona formasaun ba funsionáriu na’in-133 husi ministériu no ajénsia governamentál hamutuk 15, ne’ebé serbisu iha pilár ASEAN Economic Community (AEC).
“Husu formandu sira atu aproveita tempu ho didi’ak hodi aprende atu aumenta liután abilidade [iha língua]”, nia hato’o iha edifísiu KFP, Matadouru, Dili, sesta-feira ne’e.
Iha fatin hanesan, Sekretária-Ezekutiva KFP, Maria da Costa Oliveira, dehan importante tebes atu prepara rekursu umanu, liuliu funsionáriu sira atu iha abilidade di’ak iha lia-inglés.
Programa ELTAA finansia husi Governu Austrália hodi hala’o durante tinan lima atu apoiu Timor-Leste nia esforsu atu adere no integra ba ASEAN, liuhusi hadi’a abilidade prátika lia-inglés ba funsionáriu Governu sira ne’ebé envolve iha responsabilidade relasiona ho ASEAN.
Programa ne’e fornese treinamentu língua ingleza ne’ebé orienta ba nesesidade iha fatin serbisu no adapta ho nesesidade funsionáriu Governu sira. Kursu sira ne’e dezenvolve atu hametin kapasidade komunikasaun partisipante sira no hasa’e sira-nia kapasidade atu kontribui ho efetivu iha reuniaun ASEAN, kooperasaun rejionál no envolvimentu internasionál.
Lansamentu edisaun daruak husi Programa ELTAA marka tan etapa importante ida iha esforsu Timor-Leste atu dezenvolve servisu públiku ida ne’ebé iha kapasidade, konfiansa no kompeténsia atu apoia nasaun ne’e nia adezaun ba ASEAN no nia envolvimentu iha futuru nu’udar Estadu-membru.
Jornalista: Nelson de Sousa
Editora: Maria Auxiliadora
