DILI, 03 Jullu 2026 (TATOLI) – Institutu Kualidade Timor-Leste (IQTL), tutela husi Ministériu Koordenadór Asuntu Ekonómiku (MKAE) lansa, ohin, fatuk dahuluk ba konstrusaun Laboratóriu Ai-han no Bebida (Food and Beverages).
Koordenadora-Jerál MKAE, Jorge Rui de Carvalho, hateten laboratóriu ne’e importante tebes atu apoia setór privadu sira ne’ebé halo esportasaun ba produtu sira iha rai-laran. Tanba durante ne’e, sira atu halo esportasaun ba produtu tenke bá halo teste iha iha rai-li’ur.
“Ita-nia laboratóriu ba kalibrasaun nian ne’e iha ona, maibé laboratóriu ba teste kualidade ai-han no bebida mak seidauk. Entaun, ohin ita lansa fatuk dahuluk ba konstrusaun laboratóriu nune’e ita iha fatin própriu atu fasilita ita-nia setór privadu sira hetan sertifikadu kualidade no akreditasaun própriu ba produtu sira ne’ebé atu haruka bá li’ur”, Jorge Rui de Carvalho hateten iha Bebora.
Nia dehan ho lansamentu fatuk dahuluk ne’e espera konstrusaun bele finaliza tuir tempu, husi Jullu 2026-Janeiru 2027, nune’e bele tulun setór privadu sira halo teste ba produtu lokál.
Bazeia ba kontratu, laboratóriu ne’e konstrui durante fulan neen, ne’ebé responsabiliza husi empreza Regulesleo Unipessoal Lda., ho totál orsamentu hamutuk $98.642.
Prezidente IQTL, Izilda Manuela da Luz, hateten konstrusaun laboratóriu ne’e ho objetivu mak atu asegura no halo teste ba ai-han no bebida katak, produtu sira ne’ebé distribui iha merkadu nasionál no internasionál seguru ba konsumidór no kumpre padraun no regulamentu sira.
Laboratóriu ne’e sei monitoriza kualidade no seguransa produtu sira, apoia implementasaun regulamentu Governu, no fornese dadus sientífiku hodi apoia apoia prosesu foti desizaun regulatória, nune’e mós atu proteje saúde publika.
“Ita espera laboratóriu ne’e hotu lalais atu apoia ita-nia setór privadu sira, tanba durante sira tenke hasai osan lubuk ida lori amostra bá halo teste iha ema-nia laboratóriu iha rai-li’ur”, dehan.
Na’in ba empreza Regulesleo Unip Lda., Julrionobio Maria da Silva, agradese Governu ne’ebé fó fiar hodi kaer projetu ne’e no nia garante sei finaliza obra tuir akordu ne’ebé iha.
Notísia relevante: IQTL planeia tinan oin harii laboratóriu ai-han no bebida
Jornalista: Arminda Fonseca
Editora: Maria Auxiliadora
