DILI, 10 Outubru 2025 (TATOLI)—Institutu Nasionál Kualidade Timor-Leste, Institutu Públiku (IQTL,I.P sigla portugés) iha ona planu, iha tinan oin sei harii laboratóriu ida ba ai-han no bebida.
“Objetivu ita harii laboratóriu ne’e mak atu fasilita setór privadu sira halo teste ba produtu ruma ne’ebé prodús karik la presiza lori bá rai-li’ur maibé halo teste iha rai-laran de’it,” Vogál III iha Departamentu Kualifikasaun Asuntu Internasionál IQTL, Tolentino Guterres informa ba Ajénsia Tatoli iha ninia knaar fatin, Sesta ne’e.
Nia esplika, instalasaun laboratóriu ai-han no bebida sei uza halo análize ba kualidade, dezenvolvimentu konseitu kulinária, no prátika serbisu ai-han no bebida nian, ne’ebé inklui teste kímiku, mikrobiolójiku ho objetivu atu asegura seguransa no kualidade produtu, enkoraja inovasaun sabór no seluk tan.
“Objetivu husi laboratóriu ne’e mak teste kualidade no seguransa, katak halo análize mikrobiolójiku hodi detekta bakteria, teste kímiku ba konteúdu nutrisionál no kontaminante sira, no teste fíziku ba testura no propriedade produtu sira seluk,” nia akresenta.
Notísia relevante : Governu prevee $1,5 konstrui laboratóriu alimentár apoia AIFAESA teste aihan kontaminadu
Tolentino Guterres konsidera presiza harii laboratóriu tanba Timor-Leste daudaun tama ona ba Organizasaun Mundiál Komérsiu (OMK) no sei sai membru plenu Asosiasaun Nasaun Sudeste Aziátiku (ASEAN, sigla inglés), ne’ebé kestaun kualidade produtu tama hotu ba kritériu.
“Ita planu sei harii hotu iha Bebora, ne’ebé daudaun IQTL mós estabelese ona laboratóriu kalibrasaun, rua ne’e sei harii keta-ketak maibé funsaun atu ajuda ita-nia setór privadu sira hotu. Kona-ba orsamentu daudaun seidauk bele ko’alia sai maibé fiksu ona sei harii iha tinan oin,” nia subliña.
Antes ne’e, Vogál II IQTL, Gustavo de Oliveira Maia informa, laboratóriu kalibrasaun daudaun seidauk bele inaugura hodi utiliza tanba sei hein Konsellu Ministru aprova Lei Taxa ba kalibrasaun.
Jornalista : Arminda Fonseca
Editora : Julia Charatina
