DILI, 06 Outobru 2025 (TATOLI)—Governu prevee millaun $1,4 husi fundu infraestrutura ba konstrusaun laboratóriu alimentár hodi apoiu servisu Autoridade Inspesaun Fiskalizasaun no Atividade Ekonómika Sanitária Alimentár (AIFAESA) halo teste ba hahan kontaminadu sira husi operadór ekonómiku.
Notísia Relevante: AIFAESA sei estabelese laboratóriu ho kustu rihun $250 iha tinan ne’e
Inspetora Jerál Autoridade Inspesaun Fiskalizasaun no Atividade Ekonómika Sanitária Alimentár, Odete Viegas, hateten Orsamentu Jerál Estadu (OJE) 2025 ne’ebé aloka ba kapitál dezenvolvimentu AIFAESA dezde tinan 2023 ne’e ho montante rihun $250, nune’e aloka fali iha tinan 2024 nafatin ho montante rihun $250 no iha tinan 2025 realoka fali ho montante hanesan.
“Orsamentu ne’ebé aloka bele halo de’it konstrusaun infraestrutura la inklui reajente ekipamentu sira, moru protesaun, reabilitasaun aredór,” Inspetora ne’e esplika ba jornalista sira iha edifísiu AIFAESA, ohin.
Nia informa, fundu infraestrutura no proposta konstrusaun laboratóriu ne’ebé AIFAESA hato’o ho montante miliaun $1.5 maibé husi ekipa Autoridade Dezenvolvimentu Nasionál (ADN) aprova fali ho montante miliaun $1.4.
Signifika, nia dehan, osan ne’e alista ona iha fundu infraestrutura ba 2026, maibé Governu sei hahú prosesu konstrusaun iha tinan 2025 liuhusi Orsamentu Jerál Estadu (OJE) 2025 nian.
Prosesu konkursu públiku ne’e Komisaun Nasionál Aprovizionamentu (CNA) mak sei halo iha tinan ida-ne’e no prosesu pagamentu sei halo iha tinan oin 2026 nian, no laboratóriu ne’e bele konstrui hotu ona iha tinan oin, nune’e bele hala’o ona servisu kolleta amostra sira.
“Atu bele ajuda ita halo ona teste amostra sira iha rai -aran, duké ba halo teste iha rai-li’ur. Entaun, ne’e bele fó benefísiu ba AIFAESA hodi bele deteta lalais aihan kotaminadu sira durante oras 24 nia laran,” nia dehan.
Tuir nia, semana oin karta husi KAFI bele mai ona hodi kontinua prosesu ba iha CNA tanba orsamentu ne’ebé prevee ba projetu ne’e ho montante ne’ebé boot, entaun kompeténsia tomak sei lori ba Vise Primeiru-Ministru Koordenadór Asuntu Ekonómika bele asina.
“Iha fulan-Outobru ka fulan-Novembru, ita bele hahú halo prosesu konstrusaun laboratóriu aihan, nune’e AIFAESA mós hetan ona karta ida husi Terra no Propriedade identifika fatin ida iha Hera,” nia hateten.
Jornalista : Alexandra da Costa
Ediór : Cancio Ximenes
