DILI, 3 marsu 2020 (TATOLI)–Prezidente Repúblika (PR), Francisco Guterres “Lú Olo”, konsidera Konsellu veteranu presiza Sede (edifísiu) própriu ida atubele funsiona no hala’o sira-nia knaar ho di’ak.
“Ha’u hakarak hateten iha-ne’e katak, organizasaun veteranu sira-nian presiza sede ida atu Conselho dos Combatentes da Libertação Nacional (CCLN-sigla Portugéz) bele funsiona no bele hala’o sira-nia knaar ho di’ak,” PR Lú Olo hato’o konsiderasaun ne’e liuhusi ninia deskursu iha Komemorasaun Loron Nasionál Veteranu sira-nian iha Praça de Proclamação da Independéncia, iha Palásiu Governu, Dili, ohin.
Asuntu importante ne’e, Xefe Estadu hato’o ona ba Primeiru-Ministru, Taur Matan Ruak atu tau iha konsiderasaun no Primeiru-Ministru fó ona garantia.
“Kona-ba sede própriu ba Konsellu Veteranu ne’e, ha’u ho Primeiru-Ministru, Taur Matan Ruak ko’alia ona no Primeiru-Ministru rasik sei garante kondisaun ida-ne’e,” PR Lú Olo subliña.
Antes nee, Prezidente Konsellu Nasionál Veteranu, Vidal de Jesús “Riak Leman”, preokupa tanba maski estrutura ba períodu 2019-2024 estabelese ona maibé to’o oras ne’e seidauk iha edifísiu própriu ka sekretariadu atu halo knaar.
Ba asuntu ida-ne’e, Riak Leman mós hato’o ona preokupasaun ne’e ba líder másimu órgaun soberania sira atu konsidera asuntu ne’e ho sériu.
Notísia Relevante: PR Husu Ba Konsellu Veteranu Atu Grava Lalais Kombatente Ida-idak Nia Istória
Jornalista : Cipriano Colo
Editór : Cancio Ximenes
