VIKEKE, 19 Dezembru 2025 (TATOLI)—Prezidente Autoridade Munisípiu (PAM) Vikeke, Francisco C. S. de Gonzaga Soares, informa iha tinan 2026 Governu sei estabelese Balkaun Úniku iha Munisípiu Vikeke.
“Ita sei estabelese iha tinan oin,” Prezidente Autoridade Munisípiu (PAM) Vikeke ba TATOLI iha ninia kna’ar fatin, Sesta ne’e.
Nia esplika estabelesimentu Balkaun Úniku ne’e importante tanba fasilita halo atendimentu ba abitante sira-nia dokumentu ho lalais.
Kona-ba preparasaun rekursu umanu, nia dehan, daudaun ne’e hala’o hela prosesu rekrutamentu ba apoiu Balkaun Úniku no pozisaun ba apoiu administrasuan nian. Kada munisípiu ema na’in-rua (2) atu estabelese Balkaun Úniku.
Entretantu, orsamentu ba estabelesimentu Balkaun Úniku ne’ebé nasionál prevee ba Munisípiu Vikeke hamutuk rihun $75 hodi halo reabilitasaun eis edifísiu Sekretariadu Portugés iha-ne’ebá.
Tuir dadus, populasaun Munisípiu Vikeke totál hamutuk 102.637, no iha postu admnistrativu lima (5) kompostu husi Lakluta, Uatukarbau, Ossú, Uatulari no Vikeke Vila, totál suku hamutuk 38.
Jornalista: Vitorino Lopes da Costa
Editór: Xisto Freitas da Piedade
