Kovalima, 16 Juñu 2026 (TATOLI) – Asosiasaun Emprezária Feto Timor-Leste (AEMTL) iha Munisípiu Kovalima , rejista feto na’in-20 mak hamahan aan iha asosiasaun referida hodi envolve iha vida emprezária iha área sira hanesan konstrusaun sivil, artezenatu no alojamentu Otelaria no kioske.
“ Daudaun-ne’e, ami rejista feto-sira ne’ebé mak sai membru AEMTL hamutuk na’in-20 husi númeru ne’e feto na’in-10 envolve iha área artezenatu no feto na’in-10 hola parte iha atividade rai no empresta osan no konstrusaun”,Prezidente Asosiasaun Feto Emprezária ,iha Munisípiu Kovalima, Aurelia Doutel Sarmento Vong informa liuhusi via Telefonika .
AEMTL eziste iha Munisípiu Kovalima hahú iha 2024 hodi halibur feto emprezária sira hodi tau hanoin hamutuk, suporta malu no tulun malu hodi haburas ekonómia família rasik iha Kovalima.
Lidér Feto ne’e dehan, atividade rai no empresta osan ne’e feto sira halo ema empresta osan, liuhusi atividade ida-ne’e feto sira kontinua loke fali negósiu foun sira hanesan, prodús batako, loke kioske, faan gozael no parte balun aluga kadeira no balun promove artezenatu hanesan soru-tais no seluk tan hodi faan iha nasionál.
Durante ne’e, envolve iha vida emprezariu feto sira hasoru dezafiu sira hanesan iha artezenatu liuliu soru tais no seluk tan ladun folin iha merkadu.
Maske nune’e, feto sira buka dalan submete proposta hodi hetan oportunidade tuir treinamentu iha área sira hanesan oinsá forma grupu rai no empresta osan husi Governu liuhusi husi Sekretáriu Estadu Kooperativa (SECOOP).
“Bainhira ami submete proposta ba iha SEKoop oinsa atu forma grupu kooperativa atu bele rai no empresta osan no iha baze legál hodi asegura membru sira alende ne’e, Ministériu Koordenadór Asuntu Ekonomiku fó apoiu orsamentu $1.000 hodi halo levantamentu dadus no sosa sasan ba iha artezenatu no formasaun seluk mak hanesan formasaun dijital marketing , rai no empresta no halo analiza loke negósiu rasik”, nia informa.
Jornalista: Celestina Teles
Editor: Florencio Miranda Ximenes
