BOBONARO, 06 marsu 2024 (TATOLI)-Governu liuhosi Sekretáriu Estadu Asuntu Toponímia no Organizasaun Urbana, Germano Santa Brites Dias, uarta ne’e fó posse ba Alexandrino Pires asume kargu nu’udar Prezidente Autoridade Munisipál (PAM) Bobonaro ba mandatu 2024-2028.
Sekretáriu Estadu Germano Santa Brites, husu ba Prezidente Autoridade Munisipál emposadu ezerse kna’ar ne’e ho responsablidade, tanba kna’ar boot ida-ne’e bele halo mudansa neineik ba dezenvolvimentu setór hotu-hotu iha munisípiu Bobonaro, bainhira IX Governu implementa polítika desentralizasaun administrativa no podér lokál.
Nia subliña, atu atinje polítika ne’e prezidente foun ho estrutura presiza halibur no haku’ak entidade hotu nune’e bele hadi’ak sidade Bobonaro sai di’ak liután.
Notísia relevante: Povu Cailaco husu PAM Bobonaro foun hakbesik-an ba baze
“Ita tenke haku’ak ema hotu nune’e dezenvolvimentu bele la’o, husu tuir saida mak ita-nia sesante sira hala’o ona sai modelu hodi ita bele kontinua, sira-ne’ebé di’ak kontinua, sira-ne’ebé ladún di’ak ne’e husik hela,” nia hateten iha Jináziu Maliana.
Nia husu ba prezidente foun atu hadi’ak serbisu administrasaun no atendimentu públiku liuhosi serbí no tane povu hotu hanesan labele haree ba kór partidu no rasa.
“Imi tenke hamutuk hadi’ak Bobonaro sai sidade di’ak liután, kualkér planu dezenvolvimentu mai labele impede, fó imi-nia kontribuisaun ba dezenvolvimentu tuir idak-idak nia kompeténsia no koñesimentu,” nia fó hanoin.
Prezidente Autoridade Munisipál Bobonaro Emposadu, Alexandrino Pires, agradese ba konfiansa ne’ebé IX Governu Konstituisionál haraik ba nia no promete sei servisu ho profisionál no responsabilidade.
“Ha’u mai la’ós atu kompete, maibé mai atu hala’o orden ne’ebé mai hosi Governu Sentrál, presiza atu servisu hamutuk ho ema hotu hodi hadi’a munisipiu Bobonaro,” nia dehan.
Prezidente Autoridade Munisipál Bobonaro sesante, Ernesto de Oliveira Barreto, hateten hanesan funsionáriu públiku no veteranu, prontu koopera ho Prezidente Autoridade Munisipál Bobonaro foun hodi kontribui kapasidade no apoia programa IX Governu.
“Bobonaro ne’e presiza ita hotu nia hamutuk atubele lori la’o ba oin, Bobonaro ne’e atu di’ak, presiza ita hotu nia kontribuisaun, ita hamutuk dudu dezenvolvimentu ba oin,” nia katak.
Autoridade Munisipál Bobonaro nu’udar pesoa koletiva direitu públiku, dotada autonomia administrativa, autonomia finanseira, ne’ebé sujeita no tutela ba Ministru Administrasaun Estatál no regula ho estatutu Autoridade Munisipál no Grupu Tékniku Interministeriál bá Desentralizasaun Administrativa, aprovadu hosi Dekretu-Lei númeru 3/2016, 16 marsu, ho redasaun aprovadu hosi Dekretu-Lei númeru .84/2023, 23 Novembru.
Notísia relevante: Ernesto de Oliveira prontu entrega kargu PAM Bobonaro ho fuan
Jornalista: Sergio da Cruz
Editór: Evaristo Soares Martins
